Graft charges vs. DPWH-7 sa deco-lamps gibasura sa korte

CEBU, Philippines - Ang Sandiganbayan Second Division mibasura sa kaso sa public works officials nga gireklamo og graft tungod sa gihulagway nga anomalosong pagpamalit ug pagmuntar sa decorative lampposts atol sa 12th Association of Southeast Asian Nations (ASEAN) Summit sa Cebu City niadtong 2007. 

Sa siyam ka pahinang resolusyon nga gipagawas niadtong Hulyo 28, ang graft court mimando nga i-dismiss ang kaso gumikan kay ang kasong kriminal gipasaka nga wala mga basehang ebidensya. 

Ang maong desisyon gihimo kabahin sa kasong graft batok sa mga sakop sa Department of Public Works and Highways-Region VII director Robert Lala, kanhi assistant regional director Gloria Dindin, assistant regional director Marlina Alvizo, maintenance division OIC-chief Pureza Fernandez, maintenance division OIC-assistant chief Cresencio Bagolor, legal officer Agustinito Hermoso, planning and design division chief Luis Galang, administrative division chief Restituto Diano ug construction division chief Buenaventura Pajo.

Ang maong resolusyon gipirmahan ni Associate Justice Edilberto G. Sandoval, kini mibutyag nga mismong ang Ombudsman prosecutors miangkon niadtong ilang hearing sa Oktobre 17, 2008 nga wala sila'y kasong masang-at batok sa tanang mga akusado ug mga ebidensyang ilang nakaylap dili pa paigo aron masuportahan kini.

“The evidence are not sufficient to sustain a finding of probable cause," matud pa sa korte bahin sa pangangkon sa Ombudsman.

 Apan bisan paman sa pag-angkon, ang prosekusyon nagdumili sa pagbasura sa kaso ug mihangyo lang nga ilang bakwion ang information sheet batok sa mga akusado aron ilang mapalig-on pa ang kaso una nila kini i-refile og balik.

Ang korte midawat sa mosyon ni Lala niadtong Marso, 16, 2009 nga i-dismiss nalang ang kaso, apan wala magkahulugang gidid-an na ang Ombudsman sa pagsang-at og balik o buhion og balik ang maong kiha.

 “(I)t is clear from the manifestation of the People and from the facts extant on the records that there is no evidence against the accused. The dismissal of the case is warranted,” sumala pa sa deklarasyon ni Sandoval sa resolusyon nga gidasunan usab nila ni Associate Justices Teresita Diaz-Baldos ug Samuel Martires.

Ang korte usab nagkanayuon nga nalapas usab sa Ombudsman ang katungod sa mga akusado sa full preliminary investigation dihang ilang gidid-an ang mga akusado makakita sa gibana-banang 200 ka mga pahinang dokumento nga maoy gigamit nga basehan sa indictment.

“The Ombudsman’s finding of probable cause is tainted with grave abuse of discretion thereby violating the Accused-Movants’ right to due process of law. Evidently, it would be the height of injustice if the plea of the Accused-Movants would not be favorably considered,” sumala pa sa Sandiganbayan.

Niadtong Marso 19, ang graft court mibasura na sa kaso batok kang Isabelo Braza, presidente ug supplier nga Fabmik Construction Equipment Supply Company Inc. nga maoy giingong kontraktor ug supplier sa gialegar nga overpriced lampposts.

 Si Braza giakusahang mi-overpriced sa 89 sets nga decorative lamp assemblies nga giingong miabot sa P4.31 milyones nga paburot base sa pagbana-bana sa mga imbestigador. – BANAT NEWS