Dike project sa Litmon, 2 mil ka bags sa semento nahanaw

CEBU, Philippines - Opisyal sa barangay Dumlog ang gipangitaan sa liquidation sa sobra 5,000 ka bag nga mga semento alang sa dike nga gipatukod diha sa sitio Litmon.

Kini human masutang sobra lang sa 3,000 ka bags ang nagamit ug nahanaw ang 2,664 ka bags nga sobra ug karon gipangita na gumikan kay ang mga residente sa Litmon mireklamo na sa mga bawod nga moigo sa ilang mga balay.

Ang residente sa sitio Litmon nasagmuyo sa ilang kapitan nga si Charles Basillote tungod kay wala matiwas ang dike nga gipatukod diha sa lugar.

Gibana-banang mokabat ngadto sa 100 ka pamilya ang naapektohan sa dagkong bawod diha sa lugar, 40 ka balay ang partially damaged ug 11 ang totally damaged tungod kay nabanlas kini sa dagkong bawod kagahapon sa buntag hinuon walay gikatahong mga naangol o namatay sa insidente.

Samtang sa habig sa barangay Poblacion mikabat ngadto sa 50 ka balay ang partially ug totally damaged.

Matud sa mga residente nga wala sila magkinahanglan og mga pagkaon ug uban pa nga hinabang sa siyudad alang kanila ang ilang gusto mao nga matiwas lang ang dike.

Kahinumduman nga matag tuig ang mga residente sa lugar kinsa ang mga balay nahimutang daplin sa baybayon ang dili makatarong og pahuway kung magsugod na og dagko ang bawod sa dagat tungod sa hanging habagat ug kung dautan ang panahon.

Kahinumduman usab nga ang kagamhanan sa siyudad ang mihatag og mga hinabang pinansiyal ug mga pagkaon ngadto sa mga apektadong pamilya ug mitanyag og relocation site diha sa San Pio Village sa barangay Dumlog ug sa mga luna nga gitukoran og balay sa Gawad Kalinga diha sa barangay Mohon ug San Isidro.

Apan duha sa mga residente diha Litmon nga sila si Maria Luisa Estoral, 33 ug Melia Sabiquel, 49, nga nahinabi sa Banat News nagkanayon kagahapon nga hasolan sila tungod kay daghang mga gikinahanglang rekisitos kung mobalhin sila ngadto sa mga relocation site ug gawas niini ang kasagaran nilang panginabuhian mao ang pagpanagat.

Si Felipa Solana, hepe sa City Social Welfare and Development nga nahinabi sa mga tigbalita kagahapon nagkanayon nga duha sa mga rekisitos nga gikinahanglan nga makabalhin ngadto sa relocation site mao ang certificate of landless o ang mo-apply nga beneficiary ang walay lote nga gihuptan ug marriage certificate apan maglisod og tuman sa mga rekisitos ang ubang naapektohan tungod kay uban kanila ang walay mga kasal.

Ubang mga residente mireklamong ang gitiwas nga dike mao ang dapit nga walay kabalayang gidepensahan.

Niadtong tuig 2007, gikuso-kuso usab sa bawod ang kabalayan ug gipangbanlas, si Gobernador Gwendolyn Garcia uban sa mga opisyal sa siyudad misuroy sa lugar ug misaad ngadto sa mga residente nga tukoran sila og dike.

Ang kagamhanan sa probinsiya mihatag og sobra sa 5,000 ka bags nga semento ug ang counter part sa siyudad niini mao ang mga kabilya ug labor.

Si Basillote sa iyang bahin, nagkanayon nga miadto siya sa Kapitolyo sa milabay'ng buwan aron mangayo og dugang hinabang sa pagpatiwas sa dike apan nangangha siya tungod kay gipangitaan siya sa full liquidation sa mga semento nga nahatag sa probinsiya.

Matud sa kapitan nga base sa pakisusi sa kapitolyo ang nagamit nga semento sobra ra sa 3,000 ka bags, wala usab siya’y kalibutan kung hain napunta ang 2,644 ka bags nga semento.

Sumala pang Basillote wala diretsang gihatud ang mga semento sa barangay sanglit diha kini gipaagi sa kagamhanang lokal sa siyudad, dihang iyang gisusi ang mayor gipasa siya niini ngadto sa city engineering apan ang maong buhatan nangambot usab tungod kay wala daw sila makadawat sa mga semento.

Si Talisay City Administrator Richel Bacaltos nga nahinabi sa Banat News kagahapon nagkanayon nga susihon una niya ang maong taho aron makasiguro siya kung nakuha na ba sa siyudad ang tanang mga semento.

Matud niini nga kung dunay liquidation buot ipasabot humana ang proyekto ug ang paghimo sa proyekto ipaubos usab kini og mga proseso aron mahibaw-an ang mga nagamit nga mga materyales ug kung nahuman na ba kini. – BANAT NEWS