Governor's Night i-isnab ni Tomas

CEBU, Philippines - Mipasidaan nang daan si   Mayor Tomas Osmeña nga dili mutunga sa Governor’s Night bisan pa man kun imbitahon sa kagamhanang probinsyal.

Ang Governor’s Night maoy paghatag og pasidungog sa provincial government ngadto sa nangaging mga gobernador sa Sugbo ug sa pamilya niini.

Kini gitakdang ipahigayon sa Agosto 31, subay usab sa pagsaulog sa kagamhanan sa lalawigan niining buwana sa ika-440 ka founding anniversary sa probinsya.

Nasayran nga ang apohan sa mayor nga si Sergio Osmeña Sr. ug ang anak niini nga amahan sa mayor, Sergio Osmeña Jr, pulos nahimong gobernador sa Sugbo. Ang apohan nga Osmeña gitudlong gobernador sa Sugbo niadtong 1904 ug ang anak niini nahimo usab nga gobernador sa lalawigan niadtong 1951.

Gipadayag hinuon sa mayor nga bisan kun siya dili motunga sa okasyon apan giingong duna unya sila'y representante sa Governor’s Night.

“No, I won’t come but somebody will go, I’m sure somebody will go," nagkanayon ang mayor dihang nahinabi sa Banat News.

Nasayran nga ang maguwang sa mayor nga si Maria Victoria “Minnie” Osmeña maoy mipadala og hulagway ug memorabilia sa ilang apuhan ug amahan ngadto sa kapitolyo.

Kini alang usab sa pag-display sa mga hulagway ug mga handumanan sa nangaging 23 ka gobernador sukad nahimugso ang probinsya sa Sugbo.

Kahinumduman nga sa miaging tuig, gisaway sa mayor ang paghatag og pasidungog ni Gobernador Gwendolyn Garcia ngadto sa pipila ka Sugbuanon.

Kini tungod kay lakip sa gihatagan og award mao ang igsuon ug amahan niini nga gihulagway sa mayor nga sama rang mihatag og award sa walang kamot gikan sa tuo.

Niining higayona miingon si Osmeña nga makiangayon ang paghatag og pasidungog ni Garcia tungod kay kini giingong walay pagpihig.

“That’s fair kay at least walay pili-pili ba, ang tanang governor hatagan nila og award”, sumala ni Osmeña. – BANAT NEWS