Killer sa nanguryente'g isda gipanid-an

CEBU, Philippines - Gipanid-an karon sa kapolisan ang tulo ka tawo nga posibleng may kalambigitan sa kamatayon sa duha ug pagkaangol sa kauban niini samtang nanguryente og halwan didto sa kahumayan sa barangay Mohon, dakbayan sa Talisay niadtong Huwebes sa buntag.

Apan matud pa ni Superintendent Henry Binas, hepe sa Talisay City.Police Station nga nanglayas na ang maong mga tawo ug wala na sa ilang mga panimalay karong mga panahona.

Hinuon nagdumili siya sa pagbutyag sa mga ngalan niini samtang padayon pang gisuta ang maong kaso.

Miingon si Supt. Binas nga gisil-ing nila karon ang usa ka anggulo nga may labot sa giingong karaang panagdumot ang hinungdan sa maong pagpamatay kay matud pa usa sa mga namatay giingong nangulata og usa ka tawo didto sa Tabunok nga paryente sa mga namusil ug nanigbas nga taga sitio Libo, pipila na ka buwan ang nakalabay.

Hinuon wala usab idiskuwento sa kapolisan nga nangigi lang ang mga kriminal nga gipanguhaan sa mga biktima og halwan ang ilang kahumayan nga wala mananghid kanila.

 Mahinumdoman nga sila si Welcres Camingawan, Victor Labarejos ug Jeffrey Caprino miadto sa usa ka kahumayan sa sitio Libo aron manguryente og halwan dihang may tulo ka wala hiilhing mga tawo nga nagdala og galab sa humay ug armas de fuego

Pag-abot niini sa maong lugar gipamusil dayon   sila si Camingawan ug Labarejos nga maoy hinungdan sa kamatayon dihadiha niini, samtang si Caprino nakasibat kay nakadagan kini apan naapsan pa kini ug natigbasan pa gyud sa galab sa humay, hinungdan nga naangol kini ug anaa kini karon sa tambalanan.   (BANAT NEWS)