Principal sa Can-asujan imbistigahon

CEBU, Philippines - Ipa-imbestigar ang principal ug magtutudlo sa Can-asujan National High School sa barangay Can-asujan lungsod sa Carcar ni Regional Director Recaredo Borgonia sa Department of Education labot niadtong nahitabong pagbunal- patay sa 18 anyos nga tinun-an niadtong Martes.

Si Borgonia sa press conference kagahapon mibutyag nga iya nang gimanduan ang Schools Division sa lungsod sa Carcar nga mopahigayon og imbestigasyon nga may labot sa administrative liability sa principal ug magtutudlo sa Can-asujan, unya iyang paabuton ang resulta niini kun unsay rekomendasyon subay sa imbestigasyon nga gihimo, una pa siya mohimo og aksyon nga angayang ipahamtang sa principal ug magtutudlo.

Matud ni Borgonia segOn sa nadawat niyang report, ang 18 anyos nga biktima gihulagway kining buotan ug inila sa tibuok tunghaan nga maayong mosayaw.

Apan hinuon gipakagamay lang ni Borgonia ang maong hitabo ug matud pa niya nga usa ka isolated ra ang maong kaso.

Nitataw siya nga mokabat og 100,000 ka mga tinun-an karun ang nagpa-enroll sa sekondarya sa tibuok lalawigan sa Sugbu.

Kahinumduman, dead on arrival sa tambalanan ang biktimang si John Carlo Lumba 18, tungod sa grabeng kadaot sa iyang ulo, human pusposi og kahoy sa 15 anyos nga suspetsado nga iyang silingan ug classmate.

Tungod lang sa P10 nga amotan aron ipa -burn og CD ang hinungdan sa maong pagpamospos sa suspetsado ngadto sa biktima.

Apan si Secretary Jesli Lapuz sa Department of Education sa press conference kagahapon miingon nga kasagaran sa panghitabo diha sa mga tunghaan, naggumikan sa pagpunay og tan-aw sa mga salida sa telebisyon, nga matud niya maoy makapa empluwensya sa mga bata.

Gani matud pang Lapuz nga mikabat na og 8 mil ka mga panghitabo, sama sa burglary, sex, ug uban pa nga gikalambigitan sa mga tinun-an sa tibuok nasud tungod sa pagpunay og tan-aw sa salida sa telebisyon.

Gumikan niini, si Lapuz iyang gimandoan ang National Council for Childrens Television (NCCT) nga modawat og mga reklamo gikan mismo sa mga ginikanan nga ipaagi og text.

Ang mga reklamo mahimong ipadala sa Bantay, space, TV program nga gipasalida anang adlawa ug oras, unya ibutang ang ngalan ug address nagreklamo unya i-send sa 7006228. – BANAT NEWS