CEBU, Philippines - Upat ang naangol lakip na ang usa ka gwardiya ug sakop sa Philippine Army human magkabinangga-ay ang duha ka motorsiklo didto sa Sitio Toril, barangay Korte, lungsod sa Carmen, niadtong Huwebes sa gabii.
Ang mga naangol mao ang drayber sa Honda TMX kolor pula nga si Felix Tapia, hingkod nga taga Toril, ingon man ang mga angkas niini nga sila si Anthony Villanueva, hingkod ug ang usa ka sakop sa Philippine Army nga si Sgt. Renor Ruiz, hingkod, pulos taga Toril.
Apil sa naangol si Randy Tuatson, hingkod ang drayber sa gikadinasmagay nilang motorsiklo nga Honda wave kolor blue kinsa usa ka security guard on duty sa M. Lhuillier property sa maong lugar.
Matud ni PO2 Dario Baguio sa Carmen Police dihang nahinabi sa Banat Newsnga ang motorsiklo nga gimaniho sa gwardiya nga si Tuatson, nag-roving kini palibot sa property sa M. Lhuillier niadtong higayona ug samtang naghinay kini og padagan sa pribadong dalan nga gibantayan niini kalit lang nidasmag ang gikasugat niining motorsiklo nga gimaniho ni Tapia nga misangpot sa ilang pagbinanggaay.
Matud ni PO2 Baguio tungod sa kakusog sa impact nanglupad ang tulo ka mga sakay sa motorsiklo ingon man ang gwardiya nga pulos nagdungan og tugpa sa semento nga karsada.
Pulos nakaangkon og mga samad ug pangos ang duha ka mga angkas ug ang duha ka drayber sa motorsiklo gihatod dayon ngadto sa Vicente Sotto Memorial Medical Center (VSMMC) sa dakbayan sa Sugbo.
Matud ni PO2 Baguio ang Honda TMX nga gimaniho ni Tapia maoy nakita nilang sad-an sa hitabo sanglit mikawat kini sa pikas linya sa karsada). – BANAT NEWS