Veco padayong moserbisyo

CEBU, Philippines - Gipasalig sa Visayan Electric Company (VECO) ngadto sa mga konsumidor nga magpabiling normal ug dili maapektuhan ang ilang serbisyo bisan kun mahinayon ang gibahad nga welga sa mga regular nilang kawani nga sakop sa unyon.

Ang tigpamaba sa VECO nga si Ethel Natera mipagawas sa opisyal nga pamahayag sa VECO ngadto sa mga konsumidor niini human sa natigayong “strike vote” niadtong miaging gabii diin 171 sa 179 ka mga kawani sa VECO nga sakop sa unyon pabor sa strike.

Ang Visayan Electric Company Union-Associated Labor Union dunay usa ka semana nga tagal pagpahigayon sa ilang strike human sa malampusong botasyon nila kagabii human naputol ang sabot- sabot tali sa mga kawani nga sakop sa unyon ngadto sa management niini.

Gipasalig ni Natera nga walay angay’ng kabalak-an ang publiko tungod kay ila na kining gipangandaman ug magpadayon ang ilang normal nga operasyon bisan sa himuon nga strike.

Apil sa gipasalig ni Natera nga dili mabalda ang aplikasyon sa mga customer, ingon man ang iduso nga mga reklamo sa ilang buhatan nagpabiling mahatagan dayon og dinaliang aksyon.

Gipasabot ni Natera nga gikan niadtong Mayo 17 siyam ka higayon nga nagtagbo ang VECO management ug ang mga opisyal sa unyon sa National Conciliation and Mediation Board (NCMB) alang sa pagkab-ot og kasabotan.

Gawas niini lima sab ka higayun nga nakigtagbo ang VECO management ngadto ni TUCP Partylist Representative Raymund Mendoza nga maoy nagsilbing mediator apan pabiling wala paminawa sa unyon ang mga verbal nilang gikasabotan. – BANAT NEWS