Human sa AH1N1, 15 anyos gi-dengue patay sa Medillen

CEBU, Philippines - Human sa sobra 70 ka mga tinun-an sa Medillen National High School sa lungsod sa Medillen nga gidudahang natakboyan sa AH1N1 virus karong bag-o, laing 15 anyos nga tinun-an sa 3rd year sa maong tunghaan   namatay sa sakit nga dengue dili pa lang dugay.

Gikonpirmar ni Vernito Montesclaros, ang public health nurse sa Medillen sa dihang nahinabi sa Banat News nga ang 15 anyos nga namatay sa dengue mao si Kenny Duba, molupyo sa barangay Kawit, Medillen.

Matud ni Montesclaros patay nang nahidangat sa Bogo Medillen Medical Center ang bata niadtong Domingo sa gabii. Nag-bleeding na kini nga miabot sa maong tambalanan ug nasuta nga dengue ang gikamatyan niini.

Matud ni Montesclaros nga sa wala pa ang hitabo usa ka semana nga na-admit ang   pasyente sa Verallo District Hospital sa Bogo ug gi-diagnose kini nga typhoid fever ug gipagawas sa ginikanan human sa usa ka semana. Niadtong Domingo sa gabii, gi-atake kini ug ang dugo migawas sa baba ug ilong hinungdan nga gidala og balik sa tambalanan ug didto na mamatay.

Si PO1 Anarciso Supilanas   nagkanayon nga na-report sa ilang buhatan ang maong panghitabo niana nang pagka Lunes sa gabii.

Gibutyag ni Montesclaros nga karon lang semanaha laing duha pa ka mga bata ang gi-refer nila sa tambalanan tungod gihapon sa sakit nga dengue.

Kagahapon sa buntag gipahibalo sab ni Montesclaros nga dugang duha ka babaye nga pulos tinun-an sa Grade 6 sa Antipolo Elementary School sa Medillen   nagpa check-up usab human dungan nga nakasinati og paghilanat ug pag-ubo-ubo nga sintomas sa A(H1N1).

Nasayran   sa Banat News gikan sa prinsipal sa Medillen Elementary Division nga si Juanito Diaz nga gisuspenso na ang klase sa Medillen National High School sugod kagahapon gumikan sa walay hunong nga pagdaghan sa mga tinun-an niini nga gidudahang natakboyan sa A(H1N1) ug gani duna nay tulo nga positibo niini. – BANAT NEWS