Mibabag sa pagpangronda sa mga polis giapil og tanggong

CEBU, Philippines - Gilakip og balhog sa karsel ang usa ka tawo kinsa misulay og pakgang sa gipahigayong buy bust operation sa kapolisan sa sitio Sta. Cruz, barangay Guizo, dakbayan sa Mandaue niadtong miaging gabii.

Ang nagtingkagol sa detention cell sa kapolisan sa Presinto 1 sa Centro Police Station mao si Pascual Villarba, 49-anyos, minyo ug nagpuyo sa maong dapit.

Ang nagdakop kang Villarba mao ang team sa kapolisan sa Mandaue City Police Office (MCPO) kinsa usa sa naglangkub niini si PO1 Roberto Cuyos.

Sa buy bust operation nila ni PO1 Cuyos ilang nadakpan ang usa ka Geraldine Guio-guio, hingkod ang panuigon ug silingan ni Villarba sa maong dapit. Matud ni Cuyos nga dihang ilang gidakop ang gikatahapang tigpayuhot og shabu sa maong lugar nga si Geraldine kalit lang usab mitumaw si Villarba hinungdan nga ilaha usab kining gidakop.

Si Cuyos miingon nga si Guio-guio ang ilang gidakop sa buy bust operation sa miaging gabii ug ilang nasakmit ang mga pakete sa shabu nga wala matino ang gibug-aton niini.

Dugang pa niya nga mitumaw si Villarba ug mipakgang unta sa ilang gihimo nga maoy nakaaghat nila sa pagsikop ug pasakaan usab nila kini og kaso. - Romeo T. Limpangog (BANAT NEWS)