68-anyos nga babaye napantok ang ulo, kritikal

CEBU, Philippines - Kritikal ang kahimtang sa usa ka tigulang nga babaye human kini madasmagi sa motorsiklo dihang milabang sa dalan H. Abellana sa barangay Canduman, dakbayan sa Mandaue pasado alas 7 sa miaging gabii.

Ang biktima mao si Dorothea Borbajo, 68-anyos, minyo nga taga barangay Tawason sa maong dakbayan kinsa nadasmagan sa motorsiklo nga gimaneho ni Ricky Perez, 26-anyos, ulitawo ug nagpuyo sa maong dapit.

Si SPO3 Eleazar Saromines, imbestigador sa traffic section sa Mandaue City Police Office (MCPO) miingon nga kusog nga nagdagan ang motorsiklo ug nadasmagan niini ang biktima kinsa milabang sa pikas bahin sa karsada.

Dugang pa niya nga ang kusog nga impact sa maong pagbangga maoy hinungdan sa pagkalamba sa motorsiklo nga giluwanan ni Perez ug napantok usab ang ulo sa biktima nga maoy nakaingon sa grabeng kadaut nga naangkon niini.

Matud ni SPO3 Saromines nga si Perez ang naangol usab atol sa maong aksidente ug dali nga gidala ngadto sa North General Hospital sa barangay Banilad apan gibalhin kini ngadto sa Vicente Sotto Memorial Medical Center sa dakbayan sa Sugbo.

Dugang pa ni Saromines nga sa imbestigasyon nga ilang gihimo maoy nasuta nga si Perez walay lisensiya ug wala usab makasumitir og rehistro sa motorsiklo nga gidala niini.

Kini ang hinungdan nga bisan kun naangol ug atoa sa tambalanan ang suspetsado sa gihapon ilang pasakaan og kaso nga multiple physical injuries ug pagmaneho nga walay lisensiya ug rehistro. - Romeo T. Limpangog (BANAT NEWS)