CEBU, Philippines - Duha ka mga lalaking nanguryente og isda nga gipamatay samtang usa ang naangol human gitigbas ug gipamusil sa lima ka mga lalaking gituohang nagbantay sa basakan nga gipanag-iya og pribadong tawo diin sila giingong nanguryente og isda kagahapon sa buntag diha sa sitio Libo, barangay Mohon sa dakbayan sa Talisay.
Ang mga biktimang namatay mao sila si Victor Camingaw, 28, ug Victor Labarejos, pulos mga residente sa sitio Crasher, barangay Lawaan III sa nahisgutang siyudad.
Si Camingaw nakaangkon og mga samad pinusilan sa tiyan ug ulo samtang si Labarejos nakaangkon og samad pinusilan usab sa tiyan ug samad tinigbasan dapit sa dunggan.
Samtang ang ilang kauban nga giila lang sa ngalan nga “Go” nakaangkon og samad tinigbasan sa tiil ang nakadagan ug nakapangayo og panabang sa mga residente sa lugar.
Ang laing kauban sa mga biktima nga sila si Dandi Magdadaro, Jackie Alcover ug Long-long Nacario ug mga residente sa sitio Crasher nakadagan palayo sa mga kriminal ug nakatawag ngadto sa Talisay City Police Station sa barangay Poblacion ug mitaho sa maong insidente.
Ang igsuon ni Camingaw nga si Jenes, 19, nga nahinabi sa Banat News kagahapon mibutyag nga mga alas 8 kagahapon sa buntag ang iyang igsoon uban sa iyang mga higala nga sila si Labarejos, Magdadaro, Alcover, Nacario ug “Go” mibiya gikan sa ilang lugar paingon ngadto sa usa ka basakan sa sitio Libo aron manguryente og isda.
Matud niini nga ang iyang igsuon maoy nagdala sa mga butang nga gamiton pagpanguryente og isda ug nagpungko kini ibabaw sa imbornal diha sa basakan.
Usa ka wala mailhing lalaki kinsa nagtaptap sa nawong kalit lang miduol ngadto kang Camingaw ug misita kini nga nagkanayon “kinsay nagsugo ninyo diri bay? ug dayon gitukmod niini ang biktima hinungdan nga nalukapa kini sa yuta ug dayon hulbot og pusil ug gipusil niini si Camingaw.
Si Camingaw naigo sa iyang tiyan ug giusban kini og pusil sa nahisgutang lalaki sa ulo.
Sa maong sitwasyon naalibwag og panagan ang lima ka kauban niini apan laing upat ka mga lalaki giingong kauban sa namusil ang armado usab og mga pusil ug pinote ang nag-atang na sa agianan ug mipusil ug mitigbas kang Labarejos ug Go.
Sa pagsuwat niining balita ang kapolisan nagpadayon pa sa ilang hot pursuit operation batok sa mga kriminal.
Si Supt. Henry Binas, hepe sa TCPS sa pakighinabi sa Banat News kagahapon nagkanayon nga wala pa silay nailhan bisan usa sa mga kriminal tungod kay pulos lang nangambot ang mga residente diha sa duol diin nahitabo ang insidente.
Ang kapolisan wala pa makakuha sa kumpletong pangalan sa tag-iya sa maong luna, apan sa report sa TV Patrol Sentral Visayas kagahapon ang tag-iya sa maong basakan nga nagpaila lang nga "Mercy" nagkanayon lang wala siya'y tawong gipabantay sa maong luna ug wala usab niya gidili ang pagpakuha og mga isda sa mga lim-aw niini. – BANAT NEWS