CEBU, Philippines - Dako ang pagtuo ni Board member Juan Bolo nga dili na gyud mahinayon ang iyang gitinguhang pagtukod og tunghaan sa lungsod sa Naga nga dumalaon sa probinsya sa Sugbu.
Kini human supaka ni board member Victor Maambong sa ikaunom nga distrito ang proposed ordinance ni Bolo pagtukod og provincial college diha sa maong lungsod atol sa ilang sesyon niadtong Lunes sa hapon.
Matud pa ni Maambong ang board kinahanglan motuki og maayo sa daghang mga isyu kabahin sa pagtukod og provincial college sa nahisgutang lungsod nga mokantidad og P100 milyon.
Si Bolo maoy nangamahan sa maong proposed ordinance apan si Maambong mipadayag og pagsupak inubanan sa daghang mga pangutana lakip na niini si Board member Jose Ma. Gastardo.
Atol sa sesyon niadtong Lunes, si Maambong nihulga nga mobotar siya batok sa maong ordinansa kun ang iyang mga kauban mopabor gyud unya sa final reading.
Ang giplanohang ngalan unta sa pagatukoron nga kolehiyo diha sa Naga mao ang Cebu Gwen College.
Matud ni Bolo prebilihiyo ni Maambong ang pagsupak sa iyang ordinansahon ug wala na siya’y mahimo niini.
“Iya na nga prebilihiyo (Maambong) wala tay mahimo ana,..ako nalang na gihatag niya…mopa amend-amend unya dili diay mobotar,” matud pang Bolo sa dihang na-interview sa DyDD sa milabay’ng buntag. Nipasabot si Bolo nga tumong ug tuyo unta niini ang pagtukod og kolehiyo diha sa Naga aron makatungha ang mga kabus nga kabataan sa maong lungsod.
Sa pagkakaron kapin sa 200 ka mga scholars ang gigastuhan sa probinsya nga nagtungha karon sa lain-laing kolehiyo dinhi sa dakbayan ug probinsya sa Sugbu. - Rey Pasaporte (BANAT NEWS)