Traffic Enforcer sa CITOM gitaktak

CEBU, Philippines - Gitangtang sa trabaho ang usa ka sakop sa Cebu City Traffic Operations and Management (Citom) nga gipauban sa One Stop Towing Services.

Si Mayor Tomas Osmeña mismo mipa-terminate sa serbisyo sa usa ka Jude Silva human usab ireklamo sa gidakop niini, apan gikasurpresa kini ni Citom executive director Arnel Tancinco tungod kay giingong gipatas-an sa mayor ang silot ni Silva.

Nasayran nga sa gihimong imbestigasyon sa Citom, reprimand lang ang silot nga gipahamtang sa kalapasan ni Silva.

“Naay complaint nga gipaalsa niya ang motor bisan og wala pa mahuman og issue ba, naabot ang tag-iya wala niya giuli, gi-reprimand namo pero gi-terminate man ni mayor, pabuhatan gyud to namo og termination order,” sumala ni Tancinco.

 Nagkanayon si Tancinco nga gawas kang Silva, duna pay kapin sa 30 ka traffic enforcer nga posibleng matangtang sa ilang trabaho.

Kini tungod usab kay giingong nagsige na lang og pabadlong sa ilang katungdanan ug makapila na padalhi og show cause order.

Lakip sa mga kalapasan sa badlongon nga mga traffic enforcer mao ang ilang pagpabaya sa katungdanan ug pagbiya sa pwesto.

Subay niini, mangayo karon si Tancinco og recruitment approval ngadto kang Mayor Osmeña alang sa pag-hire og dugang traffic personnel. Labing minos 30 usab ka bag-ong recruit ang gikinahanglan sa Citom executive director agi og panagana sa matangtang nga mga enforcer.

Nasayran hinuon nga gibalibaran sa mayor si Tancinco dihang kini nihangyo og dugang personnel sa miaging pipila ka mga buwan.

Ang Citom giingong duna karo’y 364 ka field personnel nga gidestino sa nagkadaiyang kadalanan dinhi sa dakbayan. - Elly Bolonos (BANAT NEWS)