3 Indians gidakop

CEBU, Philippines - Tulo ka Indian nationals ang gisikop sa mga sakop sa National Bureau of Investigation tungod sa giingong ilang kalambigitan sa insidente sa pagpanigbas sa lungsod sa Minglanilla duha na ka tuig ang nakalabay.

Ang gidakop mao sila si Harjinder Singh, Sarbjit Singh ug Jaswant Rai gisikop sa mga NBI agents pinanguluhan ni Special Investigator Arnel Pura kagahapon sa buntag sa ilang apartment sa Santa Elena Subdivision, Barangay Tisa human kini positibong giila sa ilang biktima.

Usa ka Manuel Lampria nga taga Tungkop, Minglanilla miila sa tulo nga maoy misuway og patay kaniya niadtong Nobiyembre 6, 2007 sa hapon sa Tungkop, Minglanilla dihang usa ka ginganlan og “Onek” gisinggitan ang mga Indian nationals.

Gikatahong sakay og motorsiklo ang mga Indians ug miduol kang Onek apan ang naulahi mikaratel og dagan, si Lampria nga diha sa duol maoy naalaan sa tulo ug gitigbas.

Si Lampria nagkanayon uwahi na siyang nakapanalipod kay naabtan siya sa pagtigbas diha sa iyang tuong palad ug nalandig sa Vicente Sotto Memorial Medical Center sulod sa usa ka bulan. - Edwin Ian Melecio ug Fred Languido sa The Freeman (BANAT NEWS)