Polis nakadawat og death threat

CEBU, Philippines - Ang hepe sa Talisay City Women and Children’s Protection Desk gibati og kabalaka niining “death threat” nga iyang nadawat human masang-at ngadto sa piskaliya ang kaso batok sa duha ka Indian national kinsa gipasanginlang milugos sa dalagita nilang katabang.

Si SPO1 Margienette Yosores mibutyag sa Banat News nga gipaagi sa cellphone ang maong hulga human niya mapasaka ngadto sa piskaliya sa siyudad ang kaso batok nila ni Jaskaran Singh ug Gurpreet Singh.

Ang mensahe nagkanayon “Gud pm Atty. bilib ko kaayo nimo. Abogada man guro ka pero pasagad ra man ka busisi imo baba. Siguroha baya ha og unsa mogowa imo baba tinuod”, matud pa ni Yosores.

Ang ikaduhang mensahe nagkanayon “Musta na ang abogada nga hilabtanon sa kinabuhi sa uban og sige ka ingon ana am sure you’ll never be successful with your ambition in life. Pls. mind your own business”. Niadtong Lunes naduso ang kasong serious illegal detention ug rape batok sa nahisgutang mga Indian national.

Si Gurpreet ug Jaskaran nga pulos tigpatanto og kuwarta, gipasanginlang mibanos-banos og lugos sa ilang menor de edad nga katabang nga babaye sukad niadtong Hulyo 8, 2009 hangtod sa pagkasikop kanila niadtong miaging adlaw sulod sa ilang balay nga nahimutang sa Hacienda Milan, barangay Maghaway, dakbayan sa Talisay. - Brenda D. Batuto (BANAT NEWS)