Gipuspusan og kahoy sa classmate 18 anyos patay

CEBU, Philippines - Maayong pagkabuak sa ulo sa usa ka 4th year high school student human gipusposan og dos-por-dos nga kahoy sa iyang 15-anyos nga classmate mga alas 9:00 pasado kagahapon sa buntag sulod sa ilang tunghaan sa Can-asujan National High School barangay Can-asujan lungsud sa Carcar.

Dead-on-arrival sa tambalanan sa Carcar ang biktimang si John Carlo Lumba, 18,   tungod sa grabeng kadaot sa iyang ulo, samtang ang gitumbok nga suspetsado ang iyang silingan ug classmate nga 15-anyos (ngalan gipugngan).

Si PO1 Alex Buangjog sa Carcar Police Station nga gikahinabi sa Banat News nagkanayon nga mga alas 8:40 kagahapon sa buntag ang biktimang si Lumba, nangolekta og P10 ngadto sa iyang mga classmates lakip na sa suspetsado alang sa ilang contribution pagpa-burn og CD sa ilang grupo alang sa ilang dance number.

Apan gikatahong nibalibad ang suspetsado nga gikasuko usab sa biktima hinungdan nga nagyawyaw ang 15-anyos gumikan sa pagpunay niini og paningil.

“Ang biktima daw nisulti pa dihang naningil nga ayaw sige’g ngisi-ngisi diha basin mag-ihap ka sa imong bun-og,” sumala pa ni PO1 Buanghog.

Pagka-alas 9:45 kagahapon sa buntag, samtang nag-recess ang 15-anyos nga suspetsado misulod kini sa classroom samtang ang biktimang si Lumba natulog nga nagduko sa iyang lingkuranan.

Kalit lang kining gipuspusan sa gibitbit nga dos-for-dos makadaghang higayon diha sa ulo hinungdan nga nawad-an kini sa panimuot samtang ang suspetsado daling nisibat human sa hitabo.

“Sa among tan-aw mosobra gyud to ka lima ka higayon nga gipusposan ang ulo sa biktima. Grabe man kaayo kay niliki gyud ang ulo hinuon gipa-autopsy pa to,” dugang pa ni PO1 Buangjog.

Hinuon nagtoo silang duna pay lawom nga panagbangi ang duha gawas sa ilang giawayan nga pagpa-burn sa CD tungod kay dili kini igong rason aron mopatay ang usa ka tawo.

Apan pagka-alas 2 kagahapon sa hapon ang minor de edad uban sa iyang inahan ug mga sakop sa Barangay Intelligence Network (BIN) boluntaryong mitahan sa kaugalingon sa kapulisan.

Samtang ang magtutudlo sa suspetsado ug biktima nga si Jessica Endangan mipadayag sa mga sakop sa media nga walay problema ang duha niini ka mga tinun-an gumikan kay pulos sila mga buotan.

Apan nahibulong gyud siya nganong nahitabo kini, matud pa niya mitabang pa sila sa biktima wala na mo-response pa samtang gidala paingon sa tambalanan.

Tukmang kaso ang gihikay sa kapulisan sa Carcar batok na sa suspetsadong minor de edad nga ilang ipasaka niini karong adlawa. – BANAT NEWS