Tudela nakabayad og P1.5 milyon

CEBU, Philippines - Nakabayad na ang kagamhanan sa lungsod sa Tudela sa P1.5 milyones nga utang sa probinsiya sa Sugbu nga maoy ilang gibayad kaniadto sa natanggong nga suhulan sa mga regular employees tungod sa politikanhong panagtrokis nila ni Mayor Rogelio Baquerfo ug Demetrio Granada.

Sumala pa ni Provincial Treasurer, Atty. Roy Salubre nga niadtong nakalabay nga adlaw nila nadawat ang bayad pipila ka semana human sa hingpit makabalik paglingkod si Mayor Baquerfo.

 Gipahibawo usab ni Atty. Salubre nga   giproseso na usab ang kapin sa P600 mil nga bayad ni Baquerfo sa utang gihapon sa lungsod sa pagbayad sa probinsiya sa suweldo alang sa kapin sa 100 ka mga job orders sa naasoy nga lungsod niadtong nakalabay’ng bulan.

Apan miingon si Salubre nga tangasunon kaayo ang pagpaningil ni Mayor Baquerfo sa 400 mil nga gibayad sa kagamhanan sa lungsod ngadto sa dul-an sa 50 ka mga job orders ni Granada kinsa gitumbok ni Mayor Baquerfo nga illegal nga mi-hire kanila.

 Kini tungod kay magkinahanglan pa nga hangyuon ang Commission on Audit kon COA nga mopagawas og kamanduan alang sa hingpit nga demanda ngadto kang Granada sa pag-uli sa maong kantidad. Gipasabot ni Salubre nga lalisunon pa ang pagbakwi sa maong kantidad tungod kay ang maong mga job order employees nagtrabaho usab sa gobiyerno dihang duha ka mayor pa ang naglingkod sa naasoy nga lungsod.

Nitambag ang provincial treasurer nga dili na lamang paninglan sa lungsod sa Tudela si Granada sa maong kantidad aron dili mobalik og kainit ang ilang panag-away. - Chester Abadilla