Drayber gipusil tiyan buslot

CEBU, Philippines - Nabuslot ang tiyan sa usa ka drayber sa traysikol dihang gipusil kini sa kauban niyang drayber, apan bisag samaron nakahimo pa sa pagbunal og dos por dos sa miluthang kaniya didto sa sitio Ibabao, barangay Basak, dakbayan sa Lapulapu sa miaging buntag.

Ang napusilan mao si Pepe Veloso, 46, minyo nga taga barangay Pajac, sa maong dakbayan, samtang ang nabunalan mao si Christopher Meloria, 33, minyo nga silingan ra ni Veloso.

Si PO3 Candido Baringue sa homicide section sa kapolisan sa maong dakbayan mibutyag sa Banat News nga daan na nga nagkalalis sa miaging adlaw ang duha tungod sa pag-inilogay og pasahero sa parkinganan.

Midugang si Baringue, nga gumikan kay pwerting lagota ni Meloria,  giatangan niini si Veloso sa sitio Ibabao diin didto niya kini luthanga sa dala niyang pugakhang nga gibalahan og mga boletas.

Miingon si PO3 Baringue nga naigo sa tiyan si Veloso ug miungot pa sa tiyan ang mga boletas apan nakahigayon pa kini sa pagkuha og kahoy ug gibunal sa ulo ni Meloria sa makadaghang higayon.

Dihang nalipong na si Meloria nahagba kini sa yuta ug si Veloso usab kinsa hapit na kahubsi og dugo mihutlay usab.

Ang mga nakasaksi na maoy midala sa duha kinsa pulos na grabi ang kahimtang   ngadto   sa Vicente Sotto Memorial Medical Center sa dakbayan sa Sugbu. - Romeo T. Limpangog (BANAT NEWS)