CEBU, Philippines - Usa ka 20 anyos nga ulitawo kinsa giingong gibuwagan sa uyab nagpakamatay pinaagi sa paghikog sa punoan sa mangga didto sa barangay Mohon, dakbayan sa Talisay niadtong Lunes sa buntag.
Si PO2 Roelito Tano ug PO1 Jundave David sa Talisay City Police Station miila sa naghikog nga si Maximo Melecio, 20, ulitawo, nga lumad nga taga Tungod, Inabangga, Bohol, apan temporaryong nagpuyo diha sa Mohon.
Si PO2 Tano ug PO1 David mibutyag sa Banat News kagahapon nga si Melecio puwerting guola kay gibuwagan sa iyang menor de edad nga uyab sa miaging semana.
Niadtong Domingo sa gabii giingong miadto kini sa dagat sa barangay Pooc kay maglumos unta apan gibadlong sa iyang mga amigo.
Apan nianang pagka- Lunes sa buntag puwerting kurata sa iyang iyaan dihang nagbitay na kini sa punoan sa mangga sa likod sa ilang balay kansang liog gihiktan sa pisi nga gisumpayan og kadena sa iro nga gigaid sa sanga sa mangga nga patay na.
May gibilin kining suicide note nga nangayo og pasaylo sa iyang uyab. – BANAT NEWS