Kapin 10 ka vendor gisuspenso

CEBU, Philippines - Kapin sa napulo ka mga vendors diha sa Carbon area ang gipangsuspenso ug wala tuguting makapaninda hangtud ugmang adlawa.

Ang mga vendors pulos mga sakop sa Assorted Dried Fish Vendors Association (ADFVA) nga naninda diha sa dalan Escaño ning siyudad nga sumala pang Assistant Market Administrator for Operations, Arnel Quijano, nga ang nahisgutang mga manindahay nilapas sa lugar nga gitugot kanila.

Gitataw ni Quijano nga makapila na nila badlonga ang maong mga vendors apan giingong dili mopatoo hinungdan nga ila nang gisuspenso.

“Disciplinary ba kay kung dili man gud nato disiplinahon magpatuyang na lang unya na sila diha unya kataw-an lang unya ta nila,” sumala ni Quijano.

Wala hinuon mosupak ang mga manindahay dihang gipatuman ang pipila ka adlaw nga suspension, mibahad si Quijano nga ingon usab niini unya ang dangatan sa ubang mga vendors nga dili mosunod sa regulasyon.

Nasayran nga ang ubang negosyante diha sa dalan Escaño ang gikatahong nangalipay tungod kay giingong nahawan na ang dapit nga giukupahan sa mga vendors.

Ang maong mga negosyante nihangyo ngadto kang City Market Administrator Racquel Bohol-Arce nga dili na pabalikon ang mga manindahay apan wala pa makahukom ang administrador kabahin niini.(Elly Bolonos)