CEBU, Philippines - Nangangkon og kalampusan ang Nagkahiusang Drayber sa Sugbu (NADSU) sa welga nga ilang gipahigayon kagahapong adlawa human gihulagway niini nga 75 porsiyento nga ilang naparalisa ang transportasyon sa Sugbu kagahapon.
Kini maoy gibutyag ni Ruben Rama, secretary general sa Nadsu nga alas 9 hangtud alas onse palang sa buntag kagahapon 75 porsiyento na ang pagkapiang sa transportasyon sa mga pasaheroan sa Mandaue, Consolacion ug Liloan, lakip sa apektadong mga rota sa Guadalupe, Banawa, Labangon ug B. Rodriguez.
Gilibkas hinuon nianang pagka-ala una sa hapon sa Nadsu ug nag-abot sila sa may Sto. Rosario church ug nagmartsa paingon sa Colon diin ilang gitapos ang welga dungan sa pagpahigayon og hamubo nga programa dungan sa State of the Nation Address (SONA) ni Presidente Gloria Macapagal Arroyo.
Ang mga drayber mipalanog sa ilang reklamo sa gipatas-ang multa sa mga traffic violation ug pagkawalay klarong presyo sa produktong petrolyo lakip na ang mga walay klarong pagkuha sa LTO og mga deputized agents.
Ang LTFRB-7 nakadawat og mga reklamong dunay gipangharas ug gipanghulgang drayber sa mga sakop sa Nadsu tungod sa wala nila pagsalmot sa strike.
Si Romulo Bernardez, regional director sa Land Transportation Franchising and Regulatory Board (LTFRB)-7 mibutyag nga sagad sa gipang-harass nagbiyahian og Mandaue.
Hinuon gumikan sa gipakatap nga mga polis ni PRO-7 Chief Supt. Lani-O Nerez mikalma ang mga strikers.
Kun ang Nadsu nangangkon og 75 porsiyentong kalampusan, si Bernardez mibana-bana lang nga 20 ngadto sa 30 porsiyento ra ang naapektahan.
Hinuon daling giangkon ni Roy Opura, Chairman sa Nadsu dihang nahinabi sa Banat News ang pamahayag ni Bernardez.
“Tinuod na nga mga 30 porsiyento lang ang among miyembro nga PUJ drayber, kay naa may ubang drayber nga miyembro sa ubang transport groups wala lang moapil sa among welga,” matud pang Opura apan ang importante kaniya mao nga napadangat nila ang ilang reklamo ngadto sa mga hingtungdan.
Samtang si Konsehal Gerardo Carillo, ang chairman sa Cebu City Disaster Coordinating Council (CCDCC) mibana-banang 30 ngadto sa 40 porsiyento lang ang mga jeep de pasaheroan nga wala managan sa pipila ka mga rota sa siyudad.
Kini naglakip sa mga rota sa Lahug, Guadalupe, Talamban, Inayawan, Bulacao, Labangon, Mabolo nga namatikdan ang pagminos sa mga PUJ.
Mipakatap ang dakbayan og 17 ka Kaoshiung bus, siyam ka mga multicab, pipila ka minibus ug mini-dumptuck sa kabarangayan sa dakbayan.
Matud pa ni Konsehal Sylvan Jakosalem nga napangandaman og maayo sa dakbayan ang maong strike tungod kay naleksyon na sila sa miaging transport strike.
“Sa una man gud mo-deploy lang ta og mga bus kung gikinahanglan, pero karon ato na gyud nga gipadagan bisan naa pay mga PUJ,” sumala ni Jakosalem.
Nasayran nga dunay pipila usab ka mga PUJ nga nagbiyahian sa siyudad ang gipangguyod kagahapon tungod kay kini giingong gi-parking sa dili tukmang lugar. (Uban sa report ni Elly Bolonos ug Darrel Carumba) (BANAT NEWS)