96 ka tunghaan sa Cebu gi-monitor sa DOH-7

CEBU, Philippines - Gi-monitor karon sa Department of Health (DOH) 7 ang 96 ka mga tulunghaan sa kalungsoran ug mga dakbayan dinhi sa lalawigan human usab nila madawat ang mga taho nga daghan sa mga tinun-an karon ang gipanghilantan.

Si Dr. Cora Lou Kintanar nga maoy tigpamaba sa Pandemic Influenza A Incident Command sa DOH-7 nga nahinabi sa Banat News kagahapon nagkanayon nga sagad sa mga tinun-an nga nakasinati og hilanat nagpanuigon og 11 ngadto sa 12, 13 ngadto sa 15 ug 16 sa high school ug elementarya.

Pipila sa maong mga tunghaan diha mahimutang sa Daan Bantayan, Bogo, Medellin, Boljoon ug uban pa.

Ang DOH-7 pinaagi sa ilang Regional Epidemiology Surveillance Unit inabagan sa Provincial Health Unit mipadala na og mga medical teams sa maong mga lungsod ug nanguha og swab samples sa maong mga tinun-an, gipaabot nga mogawas ang resulta duha ngadto sa tulo ka adlaw.

“Padayon namong gitambagan ang mga magtutudlo ug mga school principal sa pagpauli lamang sa mga batang ilang mahibaw-an nga gihilantan ug sa pagpadangop sa atong mga municipal health officer ug pagpatambal,” sumala pa ni Dr. Kintanar.

Samtang kadtong mga masakit nga duna nay history sa mga sakit nga hubak ug sakit sa kasing-kasing kinahanglan gyud dayong dad-on sa tambalanan aron maobserbahan ug matagad.

Gitataw niya nga nakadawat usab sila og kasayuran labot sa mga tinun-an nga gipanghilantan nga mga tinun-an sa high school ug elementarya sa Consolacion apan ang mga tagdumala wala pa usab makataho niini sa ilang buhatan.

Samtang sa laing bahin, hayan libkason na ang higpit nga pagbantay sa mga inmates sa Mandaue City Jail nga nangataptan og sakit nga Influenza A (H1N1) virus sumala pa ni Kintanar.

Kini nangahulugang mahimo na silang makadawat og balik og mga bisita human sa pipila na ka adlaw nga pagdili niini gumikan kay mitumaw nga positibo sa maong virus ang unom nila ka priso niadtong milabay'ng semana.

“Mahimong ilibkas na namo ang pagsuspenso sa dalaw kun makompleto na ang mga adlaw nga among gihatag nga tagal,” Dr. Kintanar pa sa iyang pamahayag.

Hinuon iyang gipasabot nga ilang gitugot sa mga jail personnel nga mahimong makadawat og dalaw sama sa mga abogado nga makigsulti sa binilanggo nga ilang kliyente apan kinahanglan nga magsul-ob og mask sa dili pa tugotan ang pagsulod niini. (Romeo T. Limpangog)  (BANAT NEWS)