Wa'y martial law - GMA

CEBU, Philippines - Walay martial law nga mahitabo, kini maoy pasalig ni Presidente Gloria Macapagal Arroyo atol sa iyang ika-siyam ug katapusang State of the Nation Address kagahapon sa hawanan sa Joint Session sa Kongreso.

Bisan paman sa kadaghan sa mga nanaot, miakusar kaniya og mga kahiwian ug kurapsyon daw wala maapektahi ang pangulo kagahapon samtang nag-deliver sa SONA suot ang Maria Clara nga kolor pink.

Kagahapon ang presidente nagkanayon bisan paman sa kadaghan sa mga huhungihong nga destabilisasyon, kudeta ug mga pasangil wala siya mokurog ug wala gani modeklarar og martial law.

Matud pa niya nga kung duna may mihimo-himo og mga sala nga gipahid kaniya sila ra maoy naunay niini. Iya usab gipangwitkan ang mga nanaot kaniya nga sila ray nangahadlok sa ilang kaugalingong anino.

“I never declared martial law,” pagklaro pa sa pangulo dihang grabe na kaayo ang mga pagpanaway, pangdaot ug pasangil kaniya og mga kurapsyon ug kahiwian.

Ang mga kritiko sa pangulo nagdudang dunay plano ang administrasyon nga di hinayunon ang election sa 2010 ug i-extend ang termino niini sa bisan unsang paagi, apan kagahapon giklaro sa pangulo nga wala siya’y intensyon paghimo niini.

Matud pa niini, ang mga tawong nanaot kaniya kaniadto gihatagan og kahigayonang maserbisyuhan ang katawhan apan ilang gipakyas ang katawhan.

“They had their chance to serve this good country but they blew it,” sumala pa ni Arroyo.

Daw gipasuya pa sa pangulo ang mga kritiko niini sa pag-ingon nga mokanaog lang siya sa podium apan di sa pagpangulo hangtud di matapos ang iyang termino.

“At the end of the speech (SONA) I will step down from here (podium), but not in the presidency. My term will not end until June…I have never expressed the desire to extend myself beyond my term,” pasabot pa niini.

Iyaha usab gisaway ang mga pasangil sa paggamit sa mga resources sa gobiyerno sa iyang personal nga katuyoan.

“I am falsely accused without proof of using my office for personal profit,” sumala pang Arroyo. “I am not afraid of my critiques…they are frightened of their own shadows,” dugang pa niini.

Iyaha hinuon gitambagan ang mga nangambisyong mamahimong presidente sa nasud nga kung duna silay gustong buhaton kinahanglang di sila magduha-duha paghimo niini.

“If you want something done, just do it. Do it hard, and don’t say bad words in public,” tambag pa sa pangulo nga giani og masipang pakpak ug hugyaw gikan sa mga mitambong sa SONA.

Matud pa ni Arroyo sa iyang pagdala sa renda sa panggobiyerno milambo og milig-on pa ang ekonomiya sa nasud bisan paman sa economic crisis nga nasinati karon sa kalibutan.

Kini iyang gipasalamat sa mga magbubuhis nga diyosnong mibayad sa mga obligasyon ug naggamit kini sa kaayuhan sa mga labing kabus nga mga Pilipino.

“Before this global economic crisis, we had a record 33 quarters of successive economic growth which has never happened before in the history of the Philippine economy,” sumala pa ni Press Secretary Cerge Remonde sa usa ka national television interview niadtong Domingo.

Gipahibalo ni Arroyo nga iyaha nang giawhag ang Kongreso nga hingusgan pa ug palig-unon ang Comprehensive Agrarian Reform Project, usa ka milyong pamilya ang nakabalay ug yuta pinaagi sa mga housing programs sa gobiyerno diha sa Pag-ibig, National Housing Authority ug uban pang programa mahitungod niini.

Dugang pahibalo sa pangulo nga suportahan niini ang Cheap Medicine law ug mipahibalong nagbaligya na og mga baratong tambal ang gobiyerno dinhi sa nasud. Samtang 7 milyones ka mga pamilyang kabus ang nakabenipisyo sa tag P500 nga cash nga gipang-apod agi og tabang kanila.

Mopahamtang usab og bag-ong sin taxes ang gobiyerno ngadto sa industriya sa tabaco ug ang matigom nga pundo adto gamiton sa health care sa publiko.

Gibutyag usab niini nga ang edukasyon maoy usa sa gitinguha sa gobiyerno nga makab-ot alang sa mga kabataang Pilipino, gipasigarbo sa pangulo ang katukuran sa 68,888 classrooms gikan sa 2004 hangtud Hunyo 2009. Duna nay 41,781 sa 42,008 ka barangay ang nabutangan na og elementary schools samtang 1,494 sa 1,495 ka munisipyo duna nay high schools, samtang nakabenipisyo ang 10.86 milyones nga mga eskolar sa pangulo. (Uban sa report nila ni Rey Pasaporte ug Guam Logroño)   (BANAT NEWS)