Rances supak school calendar usbon

CEBU, Philippines - Dili pabor ang Cebu City Schools Division sa usa ka balaudnon nga nagtinguhang mag-usab sa kasamtangang school calendar sa nasud.

Matud ni City Schools Division Superintendent Doctor Lorna Rances nga siya mas komportabli nga ipabilin ang naandang pagbukas ug pagsira sa klase.

Si Senador Manny Villar maoy mipalabang sa Senate Bill 565 nga mag-usab sa school calendar gikan sa Hunyo-Marso ngadto na sa Septiyembre-Mayo. Nag-unang tumong sa senador niini nga malikayan ang panahon sa ting-uwan dinhi sa nasud nga naghatag og kahasol sa mga ginikanan ilabi na sa mga tinun-an.

Gani miingon si Villar nga aduna nay mga tinun-an nga namatay human ianod sa baha ug nabuwasot sa wala matabuning manhole mugna sa pag-awas sa tubig.

Apan matud ni Rances nga labihang inita usab gikan sa buwan sa Marso ug mag-antus unya niini ang mga tinun-an sulod sa classroom.

Gipasabot sa City Schools Division Superintendent nga ang Department of Education (DepEd) daling mopasuspenso sa klase kung dili maayo ang panahon sa nasud.

Apan giingong wala pay kamanduan ang DepEd nga nagpasuspenso og klase sa usa ka tunghaan tungod sa kainit sa lawak-saringan niini.

Gipadayag ni Rances nga maayo ang tumong ni Villar sa iyang gipalabang nga balaudnon apan alang kaniya kini wala kinahanglana.

Laing tumong ni Villar sa iyang proposed measure mao ang pagpahaum usab sa ubang kanasuran diin giingong kasagaran sa klase sa mga tulunghaan didto magsugod sa buwan sa Septiyembre.

Apan ang labing mahinungdanon kang Rances mao ang paghatag og maayong kalidad sa edukasyon ngadto sa mga tinun-an sa nasud. - Elly Bolonos (BANAT NEWS)