Pamahayag ni Tomas susihon sa CHR-7

CEBU, Philippines - Gikaalarma sa Commission on Human Rights (CHR-7) ang pamahayag ni Mayor Tomas Osmeña nga nagdasig sa mga polis pagtanyag og mas dako pa nga ganti kun makapatay kini og mga notadong kriminal dinhi sa dakbayan inay nga dakpon lang.

Gitumbok sa CHR-7 ang pagpahibalo ni Osmeña niadtong miaging adlaw paghatag og P10 mil ngadto sa P20 mil nga ganti sa mga polis sa Punta Princesa Police Station nga nakasikop sa upat ka mga suspek nga mitulis sa usa ka negosyante og alahas nga gibanabanang nibalor og subra sa P6.2 milyones diin mipakapin og pamahayag ang mayor nga P50 mil ang ganti nga madawat sa maong mga polis kun mapatay ang mga kriminal.

Apan matud ni Atty. Arvin Odron, legal division sa CHR-7 sa dihang nahinabi sa Banat News nga alarming ang maong pamahayag sa mayor tungod kay makapadasig kini sa atong mga sakop sa kapolisan paglapas sa tawhanong katungod bisan niadtong mga gitumbok nga notadong kriminal.

Matud ni   Odron nga walay problema kun makapusil-patay ang mga polis atol sa alarma basta armado og manguna sa pagpamusil ang mga suspek ug igo lang modepensa ang kapolisan. – BANAT NEWS