CEBU, Philippines - Sa susamang bahin full alert ang kinatibuk-ang rehiyon siete sugod kagahapon sa alas 6 sa gabii isip kabahin sa seguridad sa ipahigayon nga State of the Nation Address (SONA) ni Presidente Gloria Macapagal Arroyo karong alas 4 sa hapon.
Kini maoy giduso nga kamanduan ni Chief Supt. Lani-O Neres sa Police Regional Office (PRO-7) human usab mimando niini ang Camp Crame sa pagpa-ubos sa full-alert sa kapolisan sa tibuok nasud alang sa (SONA) nga masigurong walay mga kagubot nga mahitabo.
Nunot niini ang mga sakop sa kapolisan sa lalawigan sa Sugbo, dali usab nga mimando sa ilang mga sakop nga magpabiling full-alert diha sa ilang tagsa-tagsa ka areas of responsibility.
Samtang si Sr. Supt. Patrocinio Comendador, direktor sa kapolisan sa dakbayan sa Sugbo ang mipahibalo nga preparado na silang daan karong adlawa.
Matud pa ni Comendador nga duha ka platoon ang iyang giandam nga mga sakop sa Crowd Dispersal Management (CDM) nga maoy tahasan pag-atubang sa mga lihok protesta.
Sa pikas bahin andam na ang kagamhanan sa dakbayan sa Sugbu pagtubag sa mga panginahanglan niadtong matanggong nga mga pasahero karong adlawa.
Kini subay usab sa subling paglusad ug transport strike sa Nagkahiusang Driver sa Sugbu (NADSU) nga gisugdan kaganihang kaadlawon.
Matud ni Konsehal Gerardo Carillo nga padaganon gilayon sa nagkadaiyang rota ang mga sakyanan sa dakbayan kun gikinahanglan.
Kini sama sa mga kaoshiung buses, mga multicab, uban sa mga sakyanan sa kabarangayan aron muhakot sa matanggong nga mga pasahero.
Ang chairman sa NADSU nga si Roy Opura niingon nga libuan sa ilang mga miyembro ang moduyog sa ilusad nga welga karong adlawa dungan sa ipahigayong lihok-protesta nunot sa ipadangat nga State of the Nation Address (SONA) ni Presidente Gloria Macapagal Arroyo.
“Nakita sa mga driver sa rehiming Gloria ba nga wa siya'y gihimong programa para maprotihian ang panginabuhi sa mga driver kun dili gilisod-lisod na hinoon pinaagi sa pagpahamtang og taas nga multahan,” sumala ni Opura.
Sa pikas bahin, alerto usab karon ang City Traffic Operations and Management (Citom) paglista sa mga jeep de pasaheroan nga gamiton sa lihok-protesta. – BANAT NEWS