Magtiayon gilutsan warrant tungod sa ilang iro nakapaak

CEBU, Philippines - Usa ka magtutudlo sa elementarya napriso karon sa Moalboal Police Station uban sa iyang bana nga drayber og traysikol human malutsi’g warrant of arrest gumikan sa kalapasan sa Republic Act (R.A.9482) kon naila nga kalapasan sa Anti Rabies Law.

Ang maong magtutudlo giila sa kapolisan sa lungsod sa Moalboal nga Cris Cabaron, 38, maestra sa Tuble Elementary School ug ang bana niining si Amon Cabaron, 39, drayber og traysikol, nagpuyo sa barangay Tuble sa nahisgutang lungsod.

Si SPO3 Teofelo Amodia Jr. ang deputy officer In-charge (OIC) sa Moalboal Police Station nga gikahinabi sa Banat News nagkanayon nga ang managtiayong Cabaron gisikop pinasikad sa warrant of arrest nga giisyu ni Judge Leopoldo Cañete sa Branch 60 sa Barili nga gipetsahan og Hulyo 16 ning buwana gumikan sa paglapas sa Akta Republika 9482.

Matud pa ni SPO3 Amodia nga P6 mil ang gidusong piyansa sa korte batok sa managtiayong Cabaron alang sa ilang temporaryong kagawasan. Karong Lunes gikatakdang mopiyansa ang magtiayon.

Sumala pa niini nga ang kaso gipasaka sa managtiayong Reynaldo ug Socorro Caballa human ang ilang 12 anyos nga grade six pupil nga anak nga lalaki gipaak sa iro sa iyang magtutudlo nga ila ra nga silingan. Matud pa niini nga wala mahusay sa ilang barangay ang maong isyu hinungdan nga ang mga ginikanan sa 12 anyos nga tinun-an sa elementarya misang-at og kaso sa magtutudlo human wala mobayad sa P3 mil nga bayranan sa anti-rabies injection.

Apan si Amon Cabaron nga gikahinabi sa Banat News mitug-an nga wala gyud sila mahusay sa barangay ug wala usab sila makahibalo nga gipasakaan diay sila’g kaso sa ilang silingan nga Caballa.

Gipasabot niini nga wala sila mahusay ug mibayad sa gipangayo sa pamilyang Caballa nga P20 mil niadtong milabay’ng tuig, kini human walay gipakitang resibo sa mga tambal sa rabies.

Samtang sa ila usab nga pagsusi sa tambalanan walay rekord nga adunay nagpatambal didto nga 12 anyos nga Caballa hinungdan nga mituo sila sa tambag sa doktor nga dili bayran kun walay ikapakita nga mga ebidensiya. (Guam Logroño)   (BANAT NEWS)