CEBU, Philippines - Nadakpan sa entrapment operation sa kapolisan sa dakbayan sa Sugbu niadtong Biyernes sa gabii ang usa ka 33 anyos human magpailang asset sa kapolisan nga nanghingi og kuwarta sa biktima sa tulis nga si Jennifer dela Cerna kinsa nakuhaan sa P7.6 milyones nga kantidad sa mga alahas niadtong milabay’ng adlaw.
Si Adonis Bacayo, 33, residente sa Kinasang-an, Pardo ning dakbayan gidakop gumikan sa kasong extortion.
Si Chief Insp. George Ylanan, hepe sa Investigation Section sa Detective Management Branch (DMB) sa Cebu City Police Office nga gikahinabi sa mga tigbalita nga didto nila madakpi sa usa ka restaurant sa Bulacao si Bacayo niadtong Biyernes sa alas 8:30 sa gabii.
Matud pa ni Ylanan nga niadtong Sabado sa buntag si dela Cerna nangayo kini’g panabang alang sa iyang security escort kang Police Regional Office (PRO-7) Chief Supt. Lani-O Neres ug nalakbitan niini nga dunay kadudahang mga tawong nangita kaniya ug nagbilin og cellphone number sa iyang mga kaliwat ug midemanda og kuwarta sa dihang naabot kini sa estambayanan sa biktima sa Magallanes.
Nunot niini, si Chief Supt. Neres mimando kang Sr. Supt. Vicente Loot sa pagpakigkooperar sa kapolisan sa dakbayan sa Sugbu.
Usa ka sakop sa DMB maoy gipa-communicate ni Bacayo ug dihang midawat sa money ilang gisikop.
Sumala pa ni Ylanan nga gipadalhan gyud nila’g igong pwersa didto sa dapit aron maseguro ang maong operasyon gumikan kay nagtoo silang kauban sa mga tulisan ang nagpakaaron-ingnong asset.
Apan sa dihang ilang nadakpan si Bacayo nasuta nga duna kini deperensya sa iyang pangutok apan bisan paman niini ilang gitanggong ug gihikay ang kasong extortion nga ilang ipasaka batok niini karong Lunes.
Si Bacayo nga gikahinabi Banat News mitug-an nga usa ka libo ra ang iyang gipangayong reward ngadto kang dela Cerna tungod sa nabasa sa pamantalaan ug nadungog sa radyo nga hatagan og reward kadtong naghatag og impormasyon sa kapolisan.
Gipadayag niini nga misaad pa siya sa iyang mga higala nga mag-inom sila ini’g balik niya kun makuha na unya niya ang reward money nga ihatag ni dela Cerna, samtang gipadayag niya nga “gumikan sa kawad-on ingon man sa kahimtang sa kalisod sa nasud.” (Guam Logroñ) (BANAT NEWS)