CEBU, Philippines - Namatay ang usa ka tawo dihang gidunggab, gipusil ug gibunalan sa ulo samtang naangol usab ang usa ka babaye kinsa nasabak sa usa KA bala dinhi sa dakbayan sa Sugbo kagahapon.
Ang nakabsan sa kinabuhi mao si Angelo Violanda, 49, taga Spolarium, barangay Duljo-Fatima, samtang ang angol mao si Sherly Edaño, 37, taga barangay Alaska, tanan ning dakbayan sa Sugbo.
Samtang ang mga suspetsadong mipatay ni Violanda giila nga sila si Edwin Florida alyas Undo ug Joselito Arellano, akyas Otik. Sumala sa kapolisan nga si Violanda mibisita sa balay sa iyang higala sa sitio San Pedro barangay Duljo dihang giduol siya sa mga suspetsado ug sa walay igong hinungdan gibunalan og tubo ang ulo niini.
Dihang natumba ang biktima giluba kini ug aron pagsiguro nga mamatay, gipusil pa gyud nga maoy hinungdan sa hinanali nga kamatayon sa maong biktima.
Samtang si Edaño nahinanok sa pagkatulog sa sulod sa ilang balay dihang gipusil siya sa wala hiilhing tawo.
Dihang mibangon siya, mao nalay namatngonan niyang hapdos na ang iyang paa kay nasabak diay sa bala,
Gihatod dayon siya ngadto sa Cebu City Medical Center aron matambalan ang iyang samad.
Samtang gipangita pa sa kapolisan ang mga suspetsado nga mipatay kang Violanda ug miangol kang Edaño. – BANAT NEWS