Kampanya batok AIDS gipalapdan

CEBU, Philippines - Gipalapdan sa kagamhanan sa dakbayan sa Sugbu ang kampanya niini batok sa Human Immunodeficiency Virus-Acquired Immune Deficiency Syndrome (HIV-AIDS) karong nasuta sa City Health Department nga may nataptan sa maong sakit nga wala sa grupo nga ilang gi-monitor.

Matud sa HIV-AIDS coordinator sa City Health nga si Doctor Ilya Tac-an nga mitaak na sila sa mga komunidad aron pag-edukar sa tanang mulopyo.

Nasayran gikan kang Tac-an nga usa ka babaye ang na-diagnose niadtong miaging buwan nga natakdan og HIV.

Sa kasamtangan, mokabat na sa upat ka tawo (duha ka lalaki ug duha ka babaye) ang natala sa City Health nga natakbuyan sa maong sakit sulod niining tuiga.

Miingon si Tac-an nga mikabat na sa 88 ka mga kaso sa HIV-AIDS ang nalista sa City Health sukad sa gihimo niining monitoring niadtong 1989.

Una nang gisaway sa United Nations Development Program (UNDP) ang Pilipinas tungod sa giingong kapakyas niini pagsumpo sa mga AIDS cases sa nasud.

Gani mipasidaan ang UNDP nga angayang seryosohon sa gobyerno ang kampanya niini batok sa nahisgutang makamatay nga sakit.

Kini tungod kay ang tanang “main ingredients” alang sa epidemiya sa HIV-AIDS giingon sa UNDP nga nia dinhi sa Pilipinas.

Gipadayag hinoon ni Tac-an nga masumpo lang ang pagkatap sa maong sakit kung ipalabi sa tawo ang disiplina sa kaugalingon.

Kini tungod kay “ang pinakakomon nga paagi sa pagtakod sa HIV-AIDS dinhi sa Pilipinas pinaagi man sa sex o pakighilawas busa kun mahimo pugong lang gyud, iutong-utong lang, pero kung dili gyud kapugngan, kinahanglang mogamit og protection,” matud pa niTac-an.

Ang gipasabot sa HIV-AIDS coordinator nga protection sa pakighilawas mao ang condom nga maoy giduso usab sa UNDP. – BANAT NEWS