CEBU, Philippines - Si municipal planning and development officer Jesus Cavalida sa lungsod sa Alegria mipasidaan nga gawas kun mosagop ang katawhan sa tibuok nasud sa tanang panagang batok sa climate change kon kausaban sa klima magsagubang ang nasud sa nagkalainlaing katalagman.
Si Cavalida kinsa maoy bise presidente sa League of Local Planning and Development Coordinator of the Philippines Inc.(LLPDCPI) mipalanog sa maong awhag ngadto sa tanang opisyal sa lalawigan, dakbayan, lungsod ug kabarangayan sa nasud ilabi na dinhi sa Sugbo base sa gihisgutan sa ilang panagtagbo niadtong miaging adlaw.
Matud pa ni Cavalida nga bisan tuod dili kaayo grabe ang kahugaw sa kahanginan dinhi sa nasud, apan mas labing maayo nga magtinabangay ang tanan aron nga dili makalitan pag-abot sa higayon.
Ang usa sa labing naghatag og epikto sa kausaban sa klima sa panahon nga misangpot ngadto sa nagkalainlaing natural nga katalagman mao ang sobra nga carbon emission.
Sa Regional Conference on Climate Change nga gipahigayon niadtong miaging adlaw dinhi sa Sugbo, gisentro ang ilang gihisgotan sa mga butang nga angay sagupon aron dili makahuygo ang pag-usab-usab sa klima sa panahon.
Si Ernie Mendoza kinsa maoy presidente sa LLPDCPI nagkanayon nga usa sa labing hatagan og dakong pagtagad mao ang bahin sa pagpaminus sa carbon emission nga gibulhot sa mga tambutso sa mga sakyanan nga gubaon og makina.
Kining carbion emission maoy nahimong hinungdan sa pagkagusbat sa lakaw sa kinaiyahan.
Gumikan niini si Cavalida nagkanayon nga usa sa epikto niini mao ang pagtubo unya sa dagat gumikan sa pagkalusno sa mga higanteng bungtod sa yelo didto sa north pole.
Matud pa ni Cavalida nga ang unang apektohan niining tanan mao ang mga nanimuyo sa kabaybayonan kay inigtubo sa dagat bunga sa mga yelo nga mahimong tubig ug makapalawom sa tubig sa kadagatan mahitabo nga kadtong mga gagmay'ng isla sa nasud matabunan na sa tubig. – BANAT NEWS