Mga tulis sa Sugbo giangkon

CEBU, Philippines – Usa sa upat ka mga tulisan nga nadakpan sa mga sakop sa Cebu City Police Office (CCPO) sa may Victor Village 1 barangay Punta Princesa kagahapon miangkon nga uban siya sa mga dagkong tulis nga nahitabo dinhi sa dakbayan sa Sugbu.

Gibutyag ni Frederick Ybañez, 37,   atol   sa iyang pag-atubang sa mga sakop sa media kagahapong adlawa nga kabahin siya sa grupo sa ilang giilang lider nga si Roy Quimada kinsa nag-atubang usab og daghang kasong pagpanulis dinhi sa dakbayan.

Si Ybañez mipasangil kang Jennifer Enriquez   nga taga Labangon nga maoy nagsugo kaniya niadtong milabay’ng Domingo human sila mangapi diha sa Banawa uban kang Roy Quimada ug Atty. Louie Arma nga tulison si Jennifer dela Cerna.

Si Enriquez giila ni Ybañez nga kliyente sa biktimang si dela Cerna nga miuli sa P6.2 milyones   nga kantidad sa mga alahas gawas sa usa ka kan-anan sa   eskina Natalio Bacalso Avenue ug Labangon.

Matud pa ni Ybañez nga si Enriquez mipahibalo kaniya nga duna siya'y mga alahas nga kuhaon ug iyang ibalik sa tag-iya ug pagkahuman ila gilayong sundon sa pagtulis diha sa dapit nga ilang nasabutan.

Sa   dihang migawas nasi dela Cerna, gitionan kini ni Ybañez samtang ang iyang kauban nga si Noel Davis maoy nagbunlot sa bag nga gisudlan sa mga alahas.

Human nila makuha dali gilayon silang misakay og motorsiklo nga nagpaabot nga gimaneho sa ilang kaubang nakasibat nga si Junjun Gamanay ug mipaturatoy pagpadagan paingon sa Tres de Abril.

“Siya si Enriquez maoy among insider sa tulis bag-o pa mi nga nagkaila niadto lang Domingo sa hapon diha sa Banawa uban sa among lider nga si Roy Quimada,” sumala pa ni Ybañez.

Si Ybañez miangkon usab atubangan sa mga sakop sa media ug mga opisyal sa kapolisan sa dakbayan nga nalambigit siya sa pagpanulis sa Oro Sugbu ug Agencia Ann diha sa may Magallanes niadtong milabay'ng tuig diin nakakuha silag P10 milyones ug gibahinan siyag P200 mil ni Roy.

Sa tulis sa Golden Treasures and Jewelry sa Mango Square nga P1 milyon   gibahinan siya’g P15 mil,   Fooda Savers Mart sa Gorordo P108 mil   ug gibahinan siyag P3,500 mil, GP Dental Supplies nga P1.3 Milyon   diin gibahinan siyag P60 mil, money changer sa Ayala P1.5 milyon og gibahinan siya'g P70 mil, LBC sa Country Mall Banilad P70 mil, gibahinan og P3 mil, money changer sa may Robinson’s P70 mil gibahinan og P3 mil.

Nalutsan usab siya'g duha ka mga warrant of arrest kagahapon adlawa nga nakuha sa mga sakop sa Theft and Robbery Section gikan sa sala ni Judge Estella Alma Singco sa Regional Trial Court gumikan sa kasong pagpanulis   sa dakbayan sa Talisay niadtong 2007.

Gibutyag niini nga nasulod siya sa grupo ni Quimada niadtong 2007 human gi-recruit sa iyang higala nga ginganlan og Badodo ug Jimmy Espina nga pulos napatay sa mga polis didto sa Makati.

Giklaro niini nga human sa ilang mga pagpanulis dinhi sa dakbayan sa Sugbo magkatag-katag sila nga mosulod gilayon og mga pension house ug mga motel sa ingon dili daling madetekan sa kapulisan.

Si Enriquez nga gikahinabi sa mga tigbalita hugtanong mihimakak sa maong pasangil gumikan kay dugay na siyang nag-negosyo'g mga alahas samtang wala usab siya magkaila ni Ybañez.

Samtang giangkon niini nga kagahapon pa lang siya makahibalo nga ang iyang abogado nga mga estafa case nga si Atty. Arma mao usab ang abogado sa bangiitang tulisan nga si Roy Quimada.

Samtang si Sr. Supt. Patrocinio Comendador miklaro nga ila pang e-evaluate ang mga testimoniya sa mga testigos batok kang Enriquez.

Kini kun ila bang mapasakaan og kaso isip prinsipal sa robbery case nga ilang ipasaka karong adlawa uban sa upat nga dinakpan nga sila si Frederick Ybañez, Jeromy Polistico, Noel Davis ug lokal nga kontak nga si Kirby Abanilla ug apil sa ilang tan-awon sa imbestigasyon ang kalambigitan sa usa ka  Atty. Arma (ngalan gipugngan). – Guam Logrono (BANAT NEWS)