Kaso batok ni Padre Ejares: Desisyon sa Korte Suprema tahuron - Dakay

CEBU, Philippines – Nanawagan ang Artsidyosesis sa Sugbu ngadto sa mga tinun-ang reklamante batok sa usa ka pari nga respetuhon ang desisyon sa Department of Justice (DOJ) may kalabutan sa kasong sexual harassment nga gipasaka sa pito ka mga tinun-an sa Abellana National School batok kang Reverend Father Benedicto Ejares.

Ang reklamo nahitabo atol sa pagpakompisal sa pari ngadto sa maong mga tinun-an dihang kini mitambong sa usa ka Life in the Spirit Seminar niadtong Nobiyembre 14, 2006.

Si Ejares gipasanginlang nangagbay, nanghinol sa mga buko-buko, ug giinat-inat ang strap sa mga bra ug uban pa sa mga dalagitang tinun-an, kini kusganong gipanghimakak sa pari ug gikatahong walay malisya ang iyang pagpakompisal sa nahisgutang mga estudyante.

Ang DOJ mitugot sa petition for review nga giduso ni Ejares ug nibasura sa kasong sexual harassment may kalabutan sa Akta Republika 7610 kon Child Abuse.

Kini tungod kay ang laing matang sa child abuse mahimo lang ipasaka kung ang reklamo wala masakop sa mga probisyon nga nalatid sa Revised Penal Code. Ang alegasyon batok kang Ejares giingong matawag nga unjust vexation ug mahimong kasilutan ubos sa Article 287 sa nahisgutang kodigo penal.

Taliwa niini, nanghinaot ang tigpamaba sa Artsidyosesis sa Sugbu nga si Monsinyor Achilles Dakay nga mohunong na ang mga reklamante ug dili na muhimo og mga lakang nga mutiwas pagdaut sa pari.

“I hope nga matagbaw sab sila sa desisyon sa husgado aron mopahuway na sa dayon ang maong kaso,” sumala ni Dakay.

Nasayran nga ang gireklamong pari padayong nag-alagad sa simbahan ug anaa gidestino sa simbahan sa Compostela, Cebu.

Giangkon ni Dakay nga dako ang kadaot nga nahatag sa nahisgutang reklamo ngadto kang Ejares ingon man sa simbahan sa Sugbu.

“Mao lagi na kay nadaut na man gyud ang pangan, mag-damage control na lang sab ta,” dugang pamahayag ni Dakay. – BANAT NEWS