5 ka titser gitaktak, mireklamo

CEBU, Philippines - Lima ka mga kanhi magtutudlo sa Queenship of Mary School diha sa Lower Calajo-an sa lungsod sa Minglanilla mireklamo kabahin sa ilegal ug dili makatarunganong pamaagi sa tag-iya sa maong tunghaan nga ilang gibutyag nga wala gani permit.

“The school has been operating for two years without permit,” sumala pa ni Glynda Empleo, Marivic Derama, Derse May Canada, Rossvel Sumabal ug Jennifer Aguirre diha sa ilang reklamong gipadala ngadto sa DepEd.

Matud pa sa lima sila gitaktak nga walay igong basehan sa ilang trabaho nga giingong bunga ra usab sa panagbangi sa tag-iyang si Ramon Larrobis ug sa administrador sa maong tunghaan nga si Nestor Castro.

Ang mga reklamante nga gitabangan sa ilang abogadong si Vicente Fernandez II midugang nga pulos mga bag-ong magtutudlo karon ang gihulip kanila.

Dugang sa alegasyon sa mga reklamante nga ang pundo sa maong tunghaan gikatahong gikuha ni Larrobis ug gibutang sa iyang personal account.

Ang pagpahibalo sa mga magtutudlo sa ilang gidangatan ngadto kang DepEd-7 regional director Recaredo Borgonia ilang gihimo aron dili magamit sa maong tunghaan ang ilang credentials isip LET passers sa management sa maong tunghaan paglukat unya og permit.

Apan ang presidente sa maong tunghaan nga si Larrobis sa pakighinabi miangkong wala pa gyud silay permit apan kasamtangan na kini karong gihikay.

Matud pa niya Nursery 1 ug Kinder II pa lang ang iyang gitanyag sa milabay'ng tuig apan kini wala magkinahanglan og permit gikan sa DepED ug karong tuiga nga duna na silay Grade One, Grade two ug Grade Three nga iyang giangkong nagkinahanglan gyud og permit.

Gihimakak usab niyang iyang gitaktak sa walay igong hinungdan ang maong mga magtutudlo tungod kay ang rason mao ang wala nila pagsunod sa iyang kamandoan ug mas gisunod nila si Castro.

Giangkon usab niyang mga bag-o pa ang iyang gipuli sa gitaktak nga mga magtutudlo ug gikatakda pang mokuha og Teacher’s Board karong Septiyembre.

Samtang iya usab giklaro nga walay dautan kun iyang kuhaon ang kwarta sa tunghaan sanglit siya maoy tag-iya niini. – BANAT NEWS