Mga Dutch nga misyonaryo gipanulis

CEBU, Philippines – Upat ka batan-ong misyonaryo nga naglakip sa duha ka Dutch national ang biktima sa pagpanulis sulod sa jeepney sa miaging gabii sa dalan M.C. Briones sa barangay Tipolo, dakbayan sa Mandaue.

Ang mga Dutch mao sila si Philip George Frankenmolen, 17, ug Casper Theodoor Dekker, 17, pulos nagpuyo sa Pag-utlan, lungsod sa Liloan kuyog nila ni Vincent Vasnillo, 17, ug Jeffrey Cabilao, 18, pulos taga Villagonzalo II sa dakbayan sa Sugbo.

Duha ka armadong mga lalaking gibanabanang anaa sa pangidaron nga 25 ngadto sa 30 anyos, kulongon ang mga buhok ug kasarangan lamang ang gidak-on sa ilang panglawas maoy mikuha sa mga butang sa biktima.

Nakuha gikan sa duha ka Dutch ilang mahalong cellphone, P2,000 cash, mga Euro nga kuwarta ug bracelet nga bulawan, samtang sila si Cabilao ug Vasnillo nakuhaan usab sa ilang mga cellphone ug salapi nga ang tanan mokabat sa P8,000 ang kantidad.

Si Insp. George Aniñon, hepe sa Theft and Robbery Section sa kapolisan nga nahinabi sa Banat News miingon nga gikan sa dakbayan sa Sugbo ug paglabay sa eskina Lorega-San Miguel sa dakbayan sa Sugbo misakay ang mga tulisan ug pag-abot sa gihitaboan mideklarar sila og tulis.

Ang duha ka tulisan daling nanganaug ug misakay sa laing jeepney balik sa dakbayan sa Sugbo. – Romeo Limpangog (BANAT NEWS)