Pamilyang Chan apektado sa pagbiya nila sa partido ni Radaza

CEBU, Philippines – Miangkon si Lapulapu City Councilor Junard "Ahong" Chan nga naapektahan na ang iyang pamilya sa pagbuwag niini sa kampo ni Lapulapu City Mayor Arturo Radaza.

Matud pa ni Chan ang labaw nga naapektuhan mao ang iyang inahang si Erlinda Chan, nga 58-anyos na ug usa ka Administrative Aid III sa kagamhanang lokal sa dakbayan sa Lapulapu sukad pa sa panahon ni Kanhi Mayor Ernest "Jun" Wiegle.

Ang inahan ni Chan gikatahong makatulo na ka higayon gibalhin og pwesto sulod lang niining tuiga ug kini pulos sa mga Isla sa Olango maong gumikan sa kalayo ug katiguwangon na niini nagsakit kini ug nalandig sa tambalanan.

Pinaagi sa mando ni Bise Mayor Mario Amores gibalhin ang inahan ni Chan niadtong Pebrero 12, 2009 sa Sta. Rosa District Hospital isip assistant cook sa maong tambalanan ug maoy tighatod sa pagkaon sa mga pasyente.

Niadtong Abril 1, 2009 gibalhin na usab kini diha sa Post Office sa Isla sa Olango ug sa milabay’ng Hunyo 30 gibalhin na usab kini ngadto sa usa ka health center sa Isla sa Caubian.

Matud pa sa konsehal walay pagsupak ang iyang inahan paghimo sa maong mga kamandoan bisan paman sa iyang pangidaron susama sa usa ka sundalo sa gobiyerno nga miresulta sa pagkasakit niini.

Gawas pa sa inahan ni Chan, apil sa gibalhin-balhin og pwesto ang igsuon ug iyaang sila si Grace Chan Carungay isip nurse sa Sta. Rosa District Hospital ug ang iyaan niini.

Matud pang Chan wala sila magdahom nga maingon niini ang dangatan sa iyang pamilya tungod sa iyang pagbuwag sa kampo ni Radaza nga giisip nilang suod nga mga higala.

Si ABC president Leo Mercado mihimakak nga ilang gisilutan ang mga Chan ug mipasabot nga ang mga Chan maoy haom sa maong mga posisyon sa nahisgutang mga dapit nga nagkulang sa mga sakop.

Midugang si Mercado nga dili angayan ikasagmuyo sa konsehal ang maong sitwasyon gumikan kay sa milabay’ng panahon nga maayo pa ang ilang relasyon ni Mayor Radaza daghan usab mga pamilyang kontra-partido nga nasagmuyo kaniya (Chan) nga gipalagpot ngadto sa Isla sa Olango. – Bong Soriano (BANAT NEWS)