CEBU, Philippines – Giangkon sa mga sakop sa kapulisan sa lungsud sa Consolacion nga duna silay lapso nga nahimo sa paghipos sa mga ebidensiya sa krimen sa gipatay’ng Norwegian nga si Nils Frode Steen Asksnes sa barangay Jugan Consolacion niadtong Lunes sa kaadlawon.
Kini maoy giangkon ni SPO3 Benjamin Ayuman, ang Officer-in-Charge (OIC) sa Consolacion atol sa pagpakighinabi sa mga tigbalita isip reaksyon sa kamandoan ni Sr. Supt. Jesus Gaquing nga sila imbestigaron gumikan sa reklamo sa Scene of the Crime Operatives (SOCO).
Giangkon niyang ilang gihipos ang mga ebidensiya sama sa armas, kutsilyo, pisi apan ang uban naabtan pa sa SOCO.
Si Gaquing mipasabot nga bisan paman og gikuhaan na og litrato sa kapulisan sa Consolacion ang crime scene isip documentation gikinahanglan pa gihapong huwaton ang SOCO una pa pamuniton ang mga butang sa crime scene.
Hinuon dunay mga sitwasyon nga ikunsiderar, sama sa mga tawo o biktima sa krimen, ang gilay-on sa lugar, apan ang nahitabo sa Consolacion dili layo sa Metro Cebu hinungdan nga duna gyu’y tulubagon ang kapulisan sa lungsod. – Guam Logroño (BANAT NEWS)