CEBU, Philippines – Usa ka 23-anyos nga dalagita ang gi-rescue sa kapulisan sa lungsod sa Alcoy niadtong Domingo sa kaadlawon human sa gikatahong gi-hostage sa iyang among German national sa gitrabahoang beach resort didto sa barangay Guiwang.
Si PO1 Herbert Pananganan sa Alcoy Police Station nga gikahinabi sa Banat News miila sa biktima nga si Jill Sudaria, 23, taga barangay Kal-anan Tabogon trabahante sa Sola Homes El Paradiso nga nahimutang sa barangay Guiwang Alcoy.
Samtang ang gireklamong amo giila sa kapulisan nga si Dr. Jurgen Rilling human wala niini papaulia ang biktimang si Sudaria sukad pa niadtong Domingo sa buntag.
Matud pa ni Insp. Wilfredo Tautojan, hepe sa Alcoy Police dihang nahinabi sa Banat News nga ang inahan ni Jill nga si Juanita maoy nangayo’g tabang sa kapulisan sa Alcoy niadtong Domingo sa hapon human gipugngan sa mga gwardya ang iyang anak subay sa mando sa German nga si Rilling.
Sila si SPO1 Eliezer Plando ug mga kaubanan mi-rescue sa dalaga nga gitanggong sa sulod sa guard house gikan pa sa alas otso sa buntag niadtong Domingo.
Nianang pagka-alas 8:00 sa gabii niadtong Domingo si Rilling nagpa-blotter usab sa police station ug mipasangil nga wala i-remit ni Sudaria ang kinitaan sa iyang resort niadtong Mayo ug Hulyo nga mokabat tanan og P100 mil.
Si Rilling mitug-an sa kapulisan nga iyahang kahera si Sudaria ug mao usab ang iyang gitahasang modeposito sa kinitaan, dihang iyang gipangitaan sa mga resibo pagdeposito sa bangko napakyas kini lakip na ang ubang record sa kwartang gihuptan niini.
Hinungdan nga dihang buot kining mopauli niadtong Domingo iyang gipa-hold hangtud nga di kini makapakita og husay sa kwartang nadispalko niini.
Matud pa ni Insp. Tautojan human magpa-blotter gipa-flash alarm dayun sa asawa sa langyaw nga si Gina Mahinay ang pagpauli sa biktima kauban sa inahan niini ug iyaan sakay sa usa ka taxi paingon sa amihanan.
Nianang alas 9:00 sa gabii na-intercept sa Talisay police ang taxi ug gi-hold ang tulo apan human adtoa sa Alcoy police ang Talisay ug napasabot sa hitabo sa sayo pa niadtong Domingo gibuhian ra gihapon si Sudaria ug inahan ug iyaan.
Ang biktima gitakdang mosang-at og kasong illegal detention batok sa magtiayon, samtang mipadayag gihapon og interes nga mopasaka og kaso ang magtiayon batok kang Sudaria. - Darrel Carumba uban sa report ni Guam Logroño (BANAT NEWS)