...Crime scene naguba na - SOCO
CEBU, Philippines – Ang mga sakop sa kapulisan sa lungsud sa Consolacion, ipaubos sa imbestigasyon sa ilang labaw sa kapulisan sa probinsya sa Sugbu human gikatahong nireklamo ang mga sakop sa Scene of the Crime Office (SOCO).
Kahinumduman nga kagahapong adlawa gidunggab patay si Nils Aksnes Frode Stein, 51, Norwegian national diha sa iyang panimalay sa Grant Ville Subdivision barangay Jugan, lungsud sa Consolacion.
Si Sr. Supt. Jesus Gaquing Jr. director sa kapulisan sa Probinsya sa Sugbu nagkanayon nga dunay basehan ang reklamo sa mga sakop sa SOCO batok sa kapulisan sa Consolacion.
Trabaho sa kapulisan mao ang pagseguro sa area nga ma-preserve ilabi na ang mga ebidensya ug ang pagdala sa mga biktima ngadto na sa tambalanan.
Una niini, nagbagulbol ang mga sakop sa SOCO-7 dihang naabot sa crime scene ang mga ebidensya sa krimen wala na diha sa lugar ug giingong gidala na ngadto sa police station.
Kini sama sa kutsilyo, armas, botelyang buak ug uban pang gihipos sa mga polis sa Consolacion nga maoy miresponde sa hitabo.
Nasayran nga dili lang kini maoy unang higayon nga ang mga police sa Consolacion nanghipos sa mga ebidensya sa crime scene bisan og wala pa diha ang mga sakop sa SOCO, niadtong gipusil-patay si Engineer Maliquias Ceballos pipila na ka bulan ang nakalabay gihipos usab dayon ang mga ebidensya butang nga gikasagmuyo sa mga imbestigador. – Guam Logroño (BANAT NEWS)
- Latest
- Trending
