CEBU, Philippines - Samdan ang usa ka security guard ug ang kauban niini dihang gipamusil sila sa wala hiilhing mga kriminal didto sa sitio Crossing, barangay Carreta, dakbayan sa Sugbo sa miaging kaadlawon.
Ang mga biktima mao sila si Sonny Boy Anco, 20, usa ka stay-in security Guard sa Christian King Properties, nga taga sitio Neighborhood barangay Tabunok, syudad sa Talisay, ug Julius Tianga, 18, silingan ni Anco.
Sa imbestigasyon sa kapolisan nasayran nga ang biktima nag-inom sa usa ka tindahan sa Crossing dihang ang grupo sa wala hiilhing mga tawo nga nag-inom usab sa maong dapit mikulata kanila sa walay igong hinungdan.
Dihang nanagan ang mga biktima aron mosumbong sa kapolisan sa Mabolo, gipamusil sila sa maong grupo ug gumikan kay dili hingigo sa lawas, mga kiting ra nila maoy nasamad sa bala. - BANAT NEWS