Tiglungkab sa eskuylahan dakpan

CEBU, Philippines - Nadakpan sa kapolisan ang duha ka mga batan-on nga gitumbok nga maoy utok sa pagpanglungkab sa mga eskuylahan sa bukirang barangay sa lungsod sa Carmen.

Ang mga nadakpan kinsa gitanggong na karon sa bilanggoan mao si Christopher Berot ug Marcelito Pisao nga pulos molupyo sa barangay Corte sa lungsod sa Carmen.

Laing kauban sa mga suspetsado nga nakaikyas mao si Rodrigo Burasca nga silingan ra sa duha.

Si Police Inspector Carlos Reyes, Jr., hepe sa kapolisan sa lungsod sa Carmen mipresentar sa mga nadakpan ngadto ni Mayor Sonia Pua atol sa pagbisita niini didto sa barangay Cantumog.

Gipahalipayan ni Mayor Pua si Reyes ug ang mga kapolisan sa lungsod ingon man si Kapitan Virgilio Escuton sa Corte nga mitabang aron pagsikop sa mga suspetsado.

Ang gipanglungkab mao ang mga tulunghaang elementarya sa Cantumog, Cantipay, Cantucong, ug Upper Natimao-an.

Ang mga nadakpan mao usay gitumbok nga milungkab sa canteen sa Saint Benedict Monastery sa barangay Corte.

Nasakmit gikan sa mga suspetsado mao ang upat ka cellphone, mga gamit sa panimalay ug mga baligya sa tindahan.

 Si Reyes miawhag sa mga biktima ingon man sa mga kadagkuan sa upat ka tulonghaan sa pag-adto sa iyang buhatan aron sa pag-ila sa mga suspetsado ug sa mga butang nga nasakmit gikan kanila. -  BANAT NEWS