CEBU, Philippines - Kapolisan sa lungsod sa Daanbantayan gibabagan sa Barangay Kapitan uban sa iyang mga barangay tanod ug supporters pinaagi sa paglusad og “people power” dihang dakpon unta sa mga polis ang usa sa ilang kabarangay niadtong Sabado sa buntag.
Kasong obstruction of justice, ingon man unjust vexation ang gi-andam sa kapulisan batok sa barangay kapitan sa Bateria nga si Arcinio Luciano, ug 16 niya ka mga barangay tanod ug mga kaubanang sinaligan.
Kini gumikan sa giingong pagbabag nila sa mga police nga makasulod sa barangay hall sa Bateria dihang ilang gidakop si Feliciano Tampus , nga gikatahong maoy gipasanginlang namutol sa linya sa mga tubo sa tubig sa ilang barangay.
Si Tampus, gireklamo sa mga residente niadtong Sabado sa alas siete sa buntag tungod sa pagpamutol niini sa mga tubo sa supply sa tubig sa nahisgutang lugar.
Apan dihang miabot ang mga polis gikatahong didto mitago sa barangay hall si Tampus, base sa police blotter giingong sinugo ni Kapitan Luciano si Tampus nga pamutlon ang mga linya sa tubig sa maong barangay.
Wala hinuon maklaro sa reklamo kun unsay rason nga gipaputol man ang mga tubo sa tubig, apan si PO3 Mamerto Gastador nga nahinabi sa Banat News mibutyag nga usa ka Geraline Almadin nagpuyo sa nahisgutang barangay ang nangayog panabang kanila kay ang iyang mga silingang sila si Marilyne Bosotros ug Mylene Orongan gipamutlan og tubo ni Tampus.
Nunut niini sila si Chief Insp. Laurel Almirante ug mga kaubanan ang ni-respondi didto sa dapit aron dakpon si Tampus, apan gikataho nga didto kini mitago sa sulod sa barangay hall.
Ang grupo nila ni Chief Insp. Almirante dihang miadto sa barangay hall nasurpresa human kalit nag-“people power” sila si Kapitan Luciano uban sa sinaligan niining si Rosanni Luche ug sa 16 ka mga barangay tanod nga nibabag aron dili dakpon si Tampus.
Hinungdan nga nahitabo ang komosyon sulod sa barangay hall tungod sa giingong kaisog nila ni Kapitan Luciano ug mga tanod pagbabag sa mga polis pagtuman sa ilang trabaho, apan bisan paman niini ila gyung nadakpan si Tampus.
Dihang ilaha untang dakpon ang kapitan gikatahong dali kini ug iyang mga tanod nga nanirado sa barangay hall ug wala na gayud mangabli hinungdan nga nanguli nalang ang mga polis.
Ang Banat News nisuway unta sa pagkuha sa habig sa barangay kapitan apan napakyas ang maong tinguha.
Karong adlawa gihikay pa sa kapulisan sa lungsod sa Daanbantayan ang kasong ipasaka batok sa grupo nila ni Kapitan Luciano ug mga kaubanan. - BANAT NEWS