CEBU, Philippines - Usa ang namatay ug laing usa ang naangol human gipusil sa wala mailhing tawo samtang nitambong og disko kagahapon sa kaadlawon sa sitio Lahug, barangay Mantalongon lungsod sa Dalaguete.
Ang namatay paglabay sa pipila ka oras sulod sa tambalanan giila sa kapulisan nga si Angelo Pialan, 24, taga sitio Ginakot, barangay Salug sa nahisgutang lungsod human makaangkon og samad pinusilan sa tuong bahin sa iyang lawas.
Samtang nagpaalim sa tambalanan dinhi sa dakbayan sa Sugbu ang higala niining si Jun Andrew Cariquitan, 22, taga sitio Upper-Lahug sa nahisgutang lugar kinsa nakaangkon usab og samad sa iyang tuong lubot.
Si PO2 Cerilo Glepa sa Dalaguete Police Station nga gikahinabi sa Banat News nagkanayon nga gikan nitambong og disco ang mga biktima tungod kay dunay pista sa nahisgutang lugar.
Samtang naglingkod sa gawas sa panimalay sa ilang higala nga ginganlan og Made kalit nga mibutho ang gikatahapan diha sa ngitngit ug mipusil kanila makaduha ka higayon.
Ang duha gidali pagdala sa Cardinal Rosales Hospital apan si Pialan nabugtuan sa iyang kinabuhi, samtang si Cariquitan gidala sa tambalanan dinhi sa dakbayan.
Matud pa ni PO2 Glepa nga posibleng gisuyaan ang mga biktima nga mibisita sa ilang mga higalang babaye hinuon wala usab nila isakway ang panagbangi sa mga batan-on sa nahisgutang dapit. - BANAT NEWS