CEBU, Philippines - Upat ang nangaangol human usa ka pribadong van nga gisakyan sa mga sakop sa 78th Infantry Battalion sa Philippine Army nga nag-escort kang Lt. Gen. Isagani Cachuela nakasaghid og traysikol niadtong milabay'ng adlaw sa barangay Bagasawe lungsod sa Tuburan.
Ang mga pasaherong nalandig sa tambalanan giilang sila si Edwin Guarin, 16, taga Campoot Tuburan, Orcelo Ochia taga Pajo- Poblacion, Tabuelan, Christine Montebon, 13, taga Putat, Tuburan, Mary Grace Sarlapan, 39, barangay Macopa, Tabuelan nga mga pasahero ni Armas Paglinawan.
Si PO1 Ariel Maravillas sa Tuburan Police Station nga gikahinabi sa Banat News nagkanayon nga ang drayber sa L300 van mao say tag-iya niini ug usa gihapon ka sundalo giilang si Estojoel Navarrete mitahan hinuon dayon human sa aksidente.
Ang mga sundalo sa van gipangulohan ni 2nd Lt. Gilbert Osorec, gikatahong gikan kini sa barangay Colonia Tuburan paingon sa lungsod sa San Remigio nga nag-escort kang Lt. Gen. Cachuela.
Apan dihang naabot sa nahisgutang dapit mi-overtake kini usa ka sakyanan sa unahan apan naatol nga mao say pagbutho sa traysikol nga may walo ka pasahero nga miresulta sa panagsaghid sa duha ka sakyanan.
Si Paglinawan nawad-an og kontrol sa manobela sa iyang traysikol ug nibangga sa punoan sa kahoy nga gemilina hinungdan sa pagkaangol sa upat niini ka mga pasahero apan gihulagway nga mga pangos ra ug bun-og ang ilang nahiaguman. - BANAT NEWS