Outbreak!

CEBU, Philippines - Gikunsiderar sa Regional Epidemiology Surveillance Unit-7 nga dunay “flu outbreak” sulod sa Mandaue City Jail gumikan sa kakalit nga pagdaghan sa natakboyang inmates sugod niadtong Biyernes sa hapon.

Gikatahong nagsugod og kasakit ang mga bilanggo pipila ka oras human usa sa ilang mga kauban ang namatay tungod sa sakit nga hubak nga giilang si Jessie Milagrosa Auguis, 28, taga barangay Looc sa maong dakbayan nga nag-atubang og kasong may kalambigitan sa ilegal nga drugas.

Dead on arrival na pag-abot sa Mandaue City District Hospital si Auguis, apan daling giklaro ni Renan Cimafranca sa RESU-7 nga wala mopakita og susamang sintomas sa ‘flu’ ang namatay.

Kagahapon giadto nila ni Dr. Expedito Medalla, Rennan Cimafranca ug Noel Gayo sa Department of Health-7 ug RESU-7 ang maong bilanggoan aron sa pagkuha og mga swab samples sa unom ka mga gihilantang mga bilanggo alang sa eksaminasyon diha sa Vicente Sotto Memorial Medical Center.

Dunay 177 ka inmates ang gipanghilantan, 18 niini mga babaye ug 159 ang mga lalaki, magpaabot pa og duha ngadto sa tulo ka adlaw una pa mogawas ang resulta sa eksaminasyon sa swab sample ug kun mogawas nga dunay positibo hatagan dayon sila og anti-viral medicine.

Sa labing ulahing paghiling sa 177 ka mga gipanghilantan 67 nalang ang duna pay hilanat ug “flu-like symptoms” samtang ang uban padayon pang giobserbahan.

Si Jail Warden Supt. Simeon Dolojo Jr. mibutyag sa Banat News nga iyang ipa-autopsy ang patay'ng lawas ni Auguis subay usab sa pagbuot sa mga kabanay niini aron pagsuta sa hinungdan gyud sa kamatayon niini gawas sa nahibaw-an na nilang daan nga duna kini sakit nga hubak.

Sumala pang Dolojo, daan nang gipailawom sa medikasyon si Auguis tungod sa gihambing sakit nga hubak nga giingong reaksyon sa withdrawal syndrome niadtong mga kanhi tiggamitan og ginadiling drugas.

 “Dugay na nga gitambalan sa iyang sakit kanang namatay, mao man ni sagad masinati sa mga drug dependents sa higayon nga naa na sila sa withdrawal stage sa paggamit sa illegal drugs,” pasabot pang Dolojo.

Nasayran nga sa 664 ka mga inmates sa MCJ 90 porsiyento niini mga drug related nga kaso.

Samtang kabahin sa gipanghilantang inmates malaumon siyang bunga lang kini sa pag-usab usab sa temperatura sa panahon karon nga moinit ug mobugnaw ug dili kini kaso sa Influenza A(H1N1) virus.

Ang mga bilanggoan sa nagkadaiyang parte sa nasud lakip na ang sa Mandaue , Cebu City ug Talisay City milusad og mga pamaagi aron kapugngan ang pagsulod sa gikahadlukang Influenza A(H1N1) virus kini sama sa pagsusi sa temperatura sa mga mobisita ug ingon man ang paglain dayon sa mga bilanggong gipanghilantan ug pagpainom kanila og daghang tubig inabagan sa ehersisyo.  - Romeo Limpangog uban sa report ni Johanna Natavio sa The Freeman ug Brenda Batuto (BANAT NEWS)