CEBU, Philippines – Gibaharan ni Cebu City Mayor Tomas Osmeña ang director sa Cebu City Medical Center (CCMC) nga si Doctor Myrna Go nga iyang pahulipan sa katungdanan kung kini walay mahimo sa iyang pagdumala sa nahisgutang tambalanan.
Wala mahimuot ang mayor sa gibutyag ni Konsehal Gerardo Carillo nga pabayron gihapon sa CCMC ang mga pasyenteng gidudahang nataptan sa sakit nga dengue.
Una nang gipahibalo sa kagamhanan sa dakbayan nga libre diha sa CCMC ang pagpatambal niadtong matakbuyan sa nahisgutang sakit. Niining higayuna, ang mayor na usab ang mipabuhagay sa iyang kasagmuyo ngadto sa direktor sa nahisgutang tambalanan ug gustong mapa-imbestigar ang maong report.
Matud pa ni Osmeña nga kung walay nahimo si Go sa pagdumala niini sa CCMC iya na kining pahulipan sa katungdanan.
Nasayran gikan sa City Epidemiology Surveillance and Statistics Unit (CESSU) nga sukad niadtong buwan sa Enero hangtud niadtong Hulyo 11, moabot na sa 432 ang nataptan sa maong sakit ug 11 na usab ang namatay.
Kini mas ubos hinuon itandi sa dengue cases nga natala sa CESSU sa susamang period sa miaging tuig nga dunay 732 ka kaso ug 32 usab ka kinabuhi ang nakalas. – Elly Bolonos (BANAT NEWS)