CEBU, Philippines - Gilaay na og pinaabot si Kagawad Joel Garganera sa barangay Tinago sa iyang gipangayo nga opinyon sa Commission on Audit (COA) may kalabutan sa pagpatuman sa siyudad sa Sugbo sa Towing Ordinance bisan kung walay kontrata tali sa usa ka towing contractor.
Ang gipasabot ni Garganera mao ang One Stop Towing Services nga gihatagan lang og provisional authority sa City government.
Gawas niini gikwestyon usab sa barangay konsehal ang paagi pagkolekta og bayad sa multa niini nga giingong bahin na lang ang ihatag ngadto sa City Treasurer’s Office.
Matud ni Garganera nga siya dili na makapaabot sa kalangay sa COA paghatag kaniya og kopya sa iyang gipangayo nga opinyon.
Tungod niini, miingon ang barangay konsehal nga iya nang ipasaka ang kaso batok sa mga opisyal sa dakbayan ug sa towing contractor sa siyudad.
“We have no recourse but to file the case na lang gyud regardless kun wala pa tay kopya sa resulta sa imbestigasyon sa COA”, sumala ni Garganera.
Nagkanayon ang konsehal ug kanhi barangay kapitan sa Tinago nga siya makigkita na sa iyang abogado aron iya nang ikapasaka ang kaso niining buwana.
Plano ni Garganera ang pagsang-at og kasong Injunction sa korte uban sa pagpangayo og Temporary Restraining Order (TRO).
Gusto ni Garganera nga ipahunong una ang pagpatuman sa towing ordinance sa dakbayan samtang husayon pa ang kaso nga iyang ipasaka.
Wala hinuon matandog ang kagamhanan sa dakbayan sa bahad sa kanhi kapitan ug padayong nangagni sa ubang towing contractor pagtanyag sa serbisyo niini.
Nasayran nga ang A Plus Towing Services padayon karong mikumpleto sa gikinahanglang mga rekisitos alang sa ilang pagserbisyo sa siyudad.
Kini gipaabot nga madugang unya sa Road Warrior ug sa One Stop Towing Services nga una nang nag-operate dinhi sa dakbayan. – BANAT NEWS