8 ka masahista gi-rescue

CEBU, Philippines - Walo ka mga masahista sa usa ka massage parlor nga nahimutang sa uptown area na-rescue sa mga sakop sa National Bureau of Investigation (NBI-7) atol sa usa ka operasyon niadtong miaging alas 9 sa gabii.

Gironda sa mga ahente sa NBI-7 ang Stress Free Massage Parlor tungod sa reklamo ni Bokal Victor Maambong nga matud pa niini ang maong masahianan gihimo lamang front sa tinuod nga negosyo nga mao ang prostitusyon.

Si NBI-7 regional director Medardo Delimos nagkanayon nga atol sa maong operasyon nasikop usab sa iyang mga ahente ang kahera sa Stress Free Massage Parlor nga nailang si Lourdes Omas-as ug ang utility worker nga si Nestor Abregana. Nahimutang ang massage parlor sa Century Plaza sa dalan Juana Osmeña.

Matud pa ni Delimos nga usa sa ilang mga ahente nagpaka-aron ingnong customer ug mibayad og P600 alang sa pagpamasahe sa usa ka babayeng masahista.

Apan taliwala sa pagmasahe, ang babaye nga masahista mitanyag og “extra service” sa kantidad nga P1,500. Nagpasabot ang extra service sa pagpakighilawas human sa masahe.

Sa dihang gidawat sa babayeng masahista ang marked money nga nagkantidad og P1,500, gilusad gilayon ang operasyon ug nasikop silang Omas-as ug Abregana.

Giapil sa pagsikop ang masahista nga mitanyag og extra service ug midawat sa marked money, apil ang pito ka mga kaubanan niining mga babayeng masahista.

Ang mga babayeng masahista mihimakak nga nagtanyag sila og “extra service.” Hinuon, patubagon sa NBI-7 ang tag-iya sa maong massage parlor nga naila lamang sa ngalang Glenn Lim.

Sumala pa ni Delimos nga si Lim ilang pasakaan og kasong kalapasan sa balaod nga naghimong krimen sa “trafficking of person” tungod sa pagpatrabaho niini og mga babaye sa imoral nga buluhaton.

Ang Cebu City Anti-Indecency Board (CAIB) nga gipanguluhan ni Dr. Rene Josef Bullecer padayong nag-monitor sa mga establisamento nga nagtanyag ug nagpasundayag og imoral nga buhat.

Samtang gihingusgan niini ang pag-monitor sa mga night bar nga nagpasundayag og mga babayeng maghubo, hingusgan usab niini ang pagbantay sa mga massage parlor kang kansang mga masahista nagtanyag og “extra service” bugti sa bayad. – BANAT NEWS