Oposisyon sa Lapulapu huyang

CEBU, Philippines - Si kanhi barangay Kapitan Angel Rodriguez sa Punta Engaño dakbayan sa Lapulapu mitug-an sa Banat News misanong sa iyang panawagan ang mga opposition leaders sa pagmugna og lig-ong partido.

Gipaabot nga maghiusa mao sila si Kon. Junard "Ahong" Chan, DILG Usec. Lito Ruiz ug negosyanteng si Efrain Pelaez nga pulos nangambisyong mahimong mayor sa Lapulapu.

Apan sa pagkakaron pagsanong palang sa tinguhang panagtigum sa maong mga buot mokandidato ang klaro apan kung si kinsa unya maoy mahimong standard bearer wala pay klaro. 

Matud pa ni Rodriguez nga lig-on ang grupo sa administrasyong Radaza maong walay lugar sa oposisyon ang pagkawatak-watak kung buot nilang modaug sa umaabot nga piniliay.

Si Efrain Pelaez Jr. nga nahinabi sa Banat News atol sa pag-abot niini gikan sa business trip sa Thailand mipadayag sa iyang tinguha sa pagka mayor sa dakbayan sa Lapulapu ug wala kini plano nga mokanaog pagka- bise mayor sa umaabot nga piniliay.

Matud pa ni Pelaez nga kontento na siya sa iyang kinabuhi karon apan gumikan sa iyang kagustuhan nga adunay kausaban sa pamaagi sa pagdumala sa kagamhanang lokal sa dakbayan sa Lapulapu ug pagserbisyo sa katawhang Oponganons hinungdan nga buot siyang mag-mayor. – BANAT NEWS