CEBU, Philippines - Nagplano ang Hunta Probinsiyal nga pasidunggan ang gihimong paningkamot sa kapolisan sa Talisay nga madakpan og dali ang killers ni Fr. Jovencio Rabusa sa milabay'ng semana.
Sila si provincial board members Juan Bolo ug Julian Daan midayeg ug buot mohatag og commendation sa paningkamot sa kapolisan sa siyudad sa Talisay pinangulohan ni Supt. Henry Biñas tungod sa dali nga pagkasikop sa upat ka mga suspetsado sa pagtulis ug pagpatay kang Fr. Jovencio Rabusa niadtong nakalabay'ng Lunes, Hulyo 6 sa barangay Cansojong siyudad sa Talisay.
Matud pa sa duha talagsaon kaayo ang gipakitang paningkamot sa Talisay Police pagkasikop dayon ug pagpasaka’g lig-ong kaso batok nila ni Ruselo Rabanes, 28, Gerald Tradio, 18 , ang 15 anyos nga lalaki nga nisurender sa kapolisan nga pulos molupyo sa barangay Cansojong ug si Jonas Andrade Turawan alyas Tingloy nga taga Poro, Camotes.
Gipasar usab sa Hunta ang laing resulosyon nila ni Bolo ug Daan nga kusganong nag-awhag kang Talisay City Mayor Socrates Fernandez nga sug-an ang mga ngitngit nga lugar sa South Coastal Road ilabina sa barangay Cansojong diin gitulis ug gipatay si Fr. Rabusa.
Gikatahong kuyaw dili lang sa usa ka pari ang maong dapit sanglit bisan kinsang tawong mahiagi diha dunay posibilidad nga mabiktima gyud o maparehas sa maong pari.
Hinuon usa ka adlaw human sa pagkapatay kang Rabusa gipaayo dayon sa dakbayan ang mga suga sa maong dapit ug nangangkong sa wala pa mahitabo ang krimen duna nay plano nga sug-an kini.
Dugang sugyot kang Fernandez nga pabutangan og police sub-station ug mga barangay tanod ang maong dapit sa labing daling panahon. – BANAT NEWS